सांगली : वादळी वारा व विजांच्या कडकडाटासह राज्यातील अनेक भागात अवकाळी पाऊस होत आहे. सांगली जिल्ह्यामध्ये झालेल्या मान्सूनपूर्व पावसाने दोघांचा बळी घेतला आहे. जिल्ह्यात झालेल्या अवकाळी पावसासोबत दोन ठिकाणी वीज पडून दोन जणांच्या मृत्यू झाला. तर अन्य दोघेजण जखमी झाले आहेत. 

सांगली (Sangli) जिल्ह्यातील शिराळा तालुक्यातल्या गिरजवडे आणि मिरज तालुक्यातल्या चाबुकस्वारवाडी या ठिकाणी दोन वेगवेगळ्या घटनांमध्ये वीज पडल्याची घटना घडली. यात शिराळाच्या गिरजवडे येथे जनावरे चारण्यासाठी गेलेल्या लक्ष्मण शेळके (वय ५७) यांच्या अंगावर वीज पडून त्यांचा जागीच मृत्यू (Death) झाला. तर दुसऱ्या घटनेत मिरज तालुक्यातल्या चाबुकस्वारवाडी येथे शेतात विहीर खुदाई करणाऱ्या कामगारांच्या अंगावर वीज पडली. यात एका कामगाराचा मृत्यू झाला. तर सोबत असलेले २ कामगार जखमी झाले आहेत. सुभाष नाईक (वय ४२) असे ठार झालेल्या कामगाराचे नाव आहे.

पाच दिवसात ४ जणांचा मृत्यू 

मागील आठवडाभरापासून अवकाळी पाऊस होत आहे. पावसासोबत वारा व विजा देखील होत आहेत. अचानक येत असलेल्या या पावसामुळे शेतातील मजूर कामावर असतात. दरम्यान सांगली जिल्ह्यामध्ये (Lightning Strike) वीज पडल्याच्या घटना घडत आहेत. यात मागील पाच दिवसात वीज अंगावर पडून चार जणांचा मृत्यू झाला आहे.