सांगली : अमली पदार्थ विरोधात पालकमंत्री यांनी स्थापन केलेला टास्क फोर्सने कारवाईचा धडाका सुरू केला आहे. त्यानुसार सांगलीच्या इस्लामपूर जवळील ओझर्डे ते घटकवाडी रस्त्यावरील कुंभार वस्ती परिसरात तब्बल आठ लाख ४० हजार रुपयांचा २७ किलो ९२५ ग्रॅम गांजा पथकाने जप्त करण्यात आला आहे. एलसीबीच्या पथकाने केलेल्या कारवाईत तिघांना अटक करण्यात आली आहे. 

अंमली पदार्थ वाहतूक व विक्री करण्यास बंदी घालण्यात आली आहे. तरी देखील सर्रासपणे विक्रीच्या अनुषंगाने वाहतूक केली जात असल्याचे उघडकीस आले आहे. प्रामुख्याने गांजा तस्करी मोठ्या प्रमाणात होत असल्याचे समोर येत आहे. अशाच प्रकारे सांगलीच्या इस्लामपूर येथील एलसीबीच्या पथकाने कारवाई करत गांजाची होत असलेली तस्करी रोखत मुद्देमाल जप्त केला आहे. 

सापळा रचत घेतले ताब्यात 

दरम्यान संशयित सुनील कुंभार हा सुजय खोत आणि परशुराम कोळी यांच्याकडून तयार गांजा घेण्यासाठी कुंभार वस्ती येथे येणार असल्याची माहिती एलसीबीच्या पथकाला मिळाली होती. त्यानुसार पोलिसांनी परिसरात सापळा लावला. काही वेळाने तिघेजण कुंभार वस्ती येथे एका शेतात असणाऱ्या उसाच्या वाड्याच्या गंजी जवळ थांबले होते. त्यातील एकाने गंजी खाली लपवलेल्या पांढऱ्या रंगाची गोणी काढली. त्याचवेळी पोलिसांनी त्यांना ताब्यात घेतले.  

इस्लामपूर पोलिसात गुन्हा दाखल 

पोलिसांनी त्यांच्याकडून तयार केलेला गांजा खरेदीसाठी आणण्याची कबुली दिली. त्यामुळे संशयित दोघांकडे केलेल्या चौकशीत नामदेव तेलंग (हैदराबाद) यांच्याकडून गांजा आणल्याचे सांगितले. पोलिसांनी संशयताकडून साधारण २७ किलो ९२५ ग्रॅम इतक्या वजनाचा गांजा हस्तगत केला आहे. या प्रकरणी इस्लामपूर पोलीस ठाण्यात गुन्हा दाखल करण्यात आला आहे.