पुण्यातील वारजेत एका महिन्यांपूर्वी सलूनमध्ये गोळीबाराचा थरार घडला होता. त्यानंतर आता सांगलीतही गोळीबाराची घटना घडली आहे. सांगलीच्या जतमध्ये एका महावितरणच्या कर्मचाऱ्याची गोळ्या झाडून हत्या करण्यात आली आहे. सांगलीच्या जममधील संखमध्ये गोळीबाराचा थरार घडला.

सांगली जिल्ह्यातील जत तालुक्यातील संखमध्ये महावितरणच्या वसुली कर्मचाऱ्याची राहत्या घराच्या परिसरात गोळ्या झाडून हत्या केल्याची घटना मध्यरात्री घडली. महावितरण कर्मचाऱ्याच्या मृत्यूने घटनेने संख परिसरात हळहळ व्यक्त केली जातंय. घटनेनंतर पोलिसांनी अवघ्या काही तासांतच आरोपींना ताब्यात घेतले आहे.

काय आहे प्रकरण?

संतोषकुमार बिरादार हे काही वर्षांपासून संख येथील महावितरणमध्ये बिलिंग क्षेत्रात काम करत होते. ते संखपासून ४ किलोमीटर अंतरावर अलीकडे पांडोझरी हद्दीत स्वतः पत्नी, एक मुलगा, दोन मुलगी राहत होते. रात्री १.३० सुमारास संतोषकुमार बिरादार हे घरासमोरील व्हरांड्यात पत्नी , दोन मुली एक मुलासोबत झोपले होते.

दोन आरोपींनी झोपलेल्या ठिकाणी संतोषकुमार यांच्या छातीवर गोळीबार करून हत्या केली. त्यानंतर आरोपी फरार झाले. खून करून आरोपी माडग्याळला जाणाऱ्या रोडलगत एका शेतामध्ये लपून बसल्याची माहिती उमदी पोलिसांना मिळाली होती. त्या अनुषंगाने एक पथक रवाना झाले आणि आरोपीला ताब्यात घेऊन चौकशी केली. त्यावेळी दोन्ही आरोपींनी सदरचा गुन्हा केल्याची कबुली दिली आहे.

उदमी पोलिसांनी अवघ्या तीन तासांत कोणताही पुरावा उपलब्ध नसताना मुख्य मारेकऱ्यांना अटक करण्यात पोलिसांना यश मिळालं. घटनास्थळी उमदी पोलिसांनी पंचनामा करून सांगली शासकीय रुग्णालयात येथे मृतदेहाचं शवविच्छेदन करण्यात आलं. त्यानंतर मृतदेह नातेवाईकांच्या ताब्यात देण्यात आला. संतोषकुमार बिरादार यांच्या मृत्यूने संख परिसरात हळहळ व्यक्त होत आहे.