मनोज जयस्वाल, साम टीव्ही

Samruddhi Mahamarg Car Accident News: बुलढाण्याजवळ झालेल्या अपघाताची घटना ताजी असतानाच आता समृद्धी महामार्गावर पुन्हा एका कारचा अपघात झाल्याची घटना समोर आली आहे. नागपूरवरून मुंबईकडे भरधाव वेगात जाणाऱ्या कारवरील चालकाचे नियंत्रण सुटले. त्यामुळे कार अनियंत्रित होऊन महामार्गावरच उलटली. या भीषण अपघातात कारमधील ३ जण गंभीर जखमी झाले.

थरकाप उडवणारी ही घटना वाशिम जिल्ह्यातील मालेगाव तालुक्यात शुक्रवारी पहाटेच्या सुमारास घडली. दरम्यान, अपघाताची माहिती मिळताच स्थानिकांसह पोलिसांनी घटनास्थळी धाव घेतली. अपघातातील जखमींना तातडीने उपचारासाठी मालेगाव येथील रुग्णालयात दाखल करण्यात आले आहे.

संतोष वाघमारे (वय20 वर्ष रा.जाफराबाद), निखिल वकोडे (वय 22 वर्ष) आणि सागर वाघमारे (वय 23 वर्ष) असं जखमी झालेल्या तरुणांची नावे आहे. हा अपघात इतका भीषण होता, की यामध्ये कारचा अक्षरशः चुरडा झाला आहे. (Latest News In Marathi)

दरम्यान, पोलिसांना अपघातग्रस्त कारमध्ये दोन वेगवेगळ्या नंबरच्या नंबर प्लेट्स आढळून आल्या आहे. त्यामुळे या कारचा नेमका नंबर कोणता असा प्रश्न पोलिसांना पडला आहे. गेल्या काही दिवसांपासून समृद्धी महामार्गावर डिझेल चोरीच्या घटना घडत आहेत. त्यामुळे हे डिझेल चोरटे असल्याची शक्यता व्यक्त होत आहे.

दरम्यान, केमिकल घेऊन जाणाऱ्या एका ट्रकचा समृद्धी महामार्गावर भीषण अपघात झाला. नाशिकहून नागपूरच्या दिशेने भरधाव वेगात निघालेल्या ट्रकचा बुलढाण्याजवळील मेहकरजवळ अचानक समोरील टायर फुटला. त्यामुळे ट्रक अनियंत्रित होऊन थेट डिव्हायडरला जाऊन धडकला. हा अपघात इतका भीषण होता, की ट्रकला अचानक आग लागली.

Edited by - Satish Daud