सचिन बनसोडे, प्रतिनिधी...

Samruddhi Expressway News: समृद्धी महामार्ग प्रवासासाठी खुला झाल्यापासून त्यावर अपघातांची मालिकाच सुरू आहे. समृद्धी महामार्गावरील वाढत्या अपघातांनी सर्वांचीच चिंता वाढवली आहे. हे अपघात रोखण्यासाठी वाहतूक प्रशासनाकडून वेळोवेळी वाहनचालकांमध्ये जनजागृती केली जात आहे.

ही वाढत्या अपघातांची मालिका लक्षात घेता समृद्धी महामार्गावर आजपासून टायर तपासूनच वाहन सोडले जाणार आहे. या वाहन तपासणी केंद्राचे आज परिवहन आयुक्तांच्या हस्ते उद्घाटन झाले. (Samruddhi Highway Latest News)

गाड्यांच्या टायरची होणार तपासणी....

याबाबत अधिक माहिती अशी की, समृध्दी महामार्गावर (Samruddhi Mahamarg) शासनाच्या परिवहन विभागाच्या वतीने शिर्डी आणि नागपूर अशा दोन ठिकाणी टायर तपासणी केंद्राची उभारणी करण्यात आली आहे. समृध्दी महामार्गाच्या शिर्डी इंटरचेंज येथील टोलनाक्यावर आज परिवहन आयुक्त विवेक भिमानवार यांच्या हस्ते टायर तपासणी केंद्राचे उद्घाटन करण्यात आले.

टायर फुटल्यामुळेच जास्त अपघात...

या टायर तपासणी केंद्राच्या माध्यमातून वाहनांची मोफत तपासणी केली जाणार आहे. समृध्दी महामार्गावरील बहुतांशी अपघात (Accident) हे वाहनांचे टायर फुटल्यामुळे होत आहेत. त्यामुळे अशा अपघातांना आळा बसावा यासाठी महाराष्ट्र शासनाचा परिवहन विभाग आणि महाराष्ट्र राज्य रस्ते विकास महामंडळ यांनी रस्ता सुरक्षेच्या दृष्टीने वाहनांच्या टायर तपासणीचा हा उपक्रम सुरू केला आहे.

या सुविधा मोफत....

या तपासणी दरम्यान टायरमध्ये त्रुटी आढळणाऱ्या वाहनांना समृद्धीवर आता नो इन्ट्री असणार आहे. दरम्यान, या उपक्रमा अंतर्गत वाहनधारकांना नायट्रोजन भरणे, बेसिक एअर फिलिंग, टायर वेअर तपासणी, वॉल्व तपासणी, वॉल्व पिन चेक आणि रिप्लेसमेंट, बेसिक पंक्चर दुरूस्ती, टायर वेअर , चेक यंत्राचे वितरण या टायर तपासणी सुविधा मोफत दिल्या जाणार आहेत. (Latest Marathi News)