नवनीत तापडीया

छ्त्रपती संभाजीनगर : शेत जमिनीसाठी सावत्र मुलाने जिवंत असलेल्या आईला ग्रामपंचायतीत कागदोपत्री मृत दाखविण्याचा धक्कादायक प्रकार वैजापूर तालुक्यातील (Sambhajinagar News) आघूर येथे उघडकीस आला आहे. या मृत्यू प्रमाणपत्राच्या (Death Certificate) आधारे ३ एकर शेतजमीन हडपण्याचा डाव महिलेने प्रकट होत उधळून लावला आहे. स्वतःच्या मृत्यू प्रमाणपत्र घेवूनच ती महिला पंचायत समितीत दाखल झाल्याने एकच गोंधळ उडाला होता. (Live Marathi News)

आघूर (संभाजीनगर) येथील मंगलबाई उत्तमसिंग राजपूत या आपल्या मुलीच्या घरी रांजणगाव येथे राहतात. आघूर शिवारात त्यांची शेतजमीन आहे. ही शेतजमीन हडपण्याच्या उद्देशाने त्यांचा दीर शंकरसिंग रतनसिंग राजपूत त्यांची दोन मुले व महिलेचा सावत्र मुलगा पंकज राजपूत यांनी या सर्वांनी मिळून खोटी माहिती देवून ग्रामसेवकाच्या स्वाक्षरीने प्रमाणपत्र तयार केले. हे प्रमाणपत्र तलाठी कार्यालयात देवून आपली जमीन नावावर करण्याचा त्यांचा डाव असल्याचे महिलेने दिलेल्या तक्रारीत म्हटले आहे.

पंचायत समितीत उडाला गोंधळ

स्वतःचे मृत्यू प्रमाणपत्र घेवून मंगलबाई या पंचायत समितीत दाखल झाल्या. त्यांनी या प्रकारची सविस्तर माहिती प्रभारी गटविकास अधिकारी एच.आर. बोयनर यांना देत संबंधितांवर कारवाईची मागणी केली. दरम्यान ग्रामपंचायतीच्या ग्रामसेवकाने कोणतीही खातरजमा न करता हे प्रमाणपत्र कसे दिले असा प्रश्न उपस्थित होत आहे.