रामू ढाकणे 

छत्रपती संभाजीनगर : पावसाळा सुरू होऊन दीड महिन्यांचा कालावधी उलटला तरी देखील छत्रपती संभाजीनगर जिल्ह्यातील अनेक गावांना पाणी टंचाईचा सामना करावा लागत आहे. सद्यस्थितीला छत्रपती संभाजीनगर जिल्ह्यातील २७९ गावांची तहान ४०७ टँकरने भागविली जात आहे. यामुळे आजही जिल्ह्यात पिण्याच्या पाण्याचा प्रश्न सुटण्यासाठी दमदार पावसाची प्रतीक्षा आहे.  

यंदाच्या उन्हाळ्यात राज्यातील जवळपास सर्वच भागात दुष्काळी परिस्थिती उद्भवलेली होती. यामुळे भीषण पाणी टंचाईचा (Water Crisis) सामना करावा लागत होता. पाण्याची समस्या दूर करण्यासाठी टँकरद्वारे पाणी पुरवठा केला जात होता. दरम्यान जून महिन्याच्या पहिल्या आठवड्यात पावसाळा सुरवात झाल्यानंतर हळूहळू पाणी टँकरची संख्या कमी झाली. मात्र संभाजीनगर (Sambhajinagar) जिल्ह्यासह मराठवाड्यातील अनेक भागात आजही पाण्याची समस्या कायम आहे. यामुळे पावसाळ्यात देखील टँकरद्वारे पाणी पुरवठा केला जात आहे.  

दमदार पावसाची प्रतीक्षा 

संभाजीनगर जिल्ह्यात आजही चारशेहून अधिक टँकरद्वारे पाणी पुरवठा केला जात आहे. यात गंगापुर तालुक्यात सर्वाधिक ११० टँकर आहेत. संभाजीनगर जिल्ह्यासह संपूर्ण मराठवाड्याची तहान भागविणाऱ्या (Jayakwadi Dam) जायकवाडी धरणाचा साठा ही ४.३ टक्क्यावर आहे. तर जिल्ह्यातील इतर लघु मध्यम आणि मोठ्या प्रकल्पातील पाणी पातळीची स्थिती जैसे थेच असल्याने नागरिकांना आता दमदार पावसाची अपेक्षा आहे.