छत्रपती संभाजीनगर : आजारी असल्याने उपचार सुरू असताना एका इसमाचा मृत्यू झाला. मात्र आपल्या आजारी मुलाचा मृत्यू झाल्याची बातमी आईच्या कानावर पडली असता हे दुःख ती सहन करू शकली नाही. मुलाच्या मृत्यूच्या धक्क्याने अवघ्या नऊ तासातच जन्मदात्या आईने देखील आपलीये प्राण सोडले. हि घटना छत्रपती संभाजीनगर जिल्ह्यातील सोयगाव तालुक्यातील तिडका या गावात घडली.  

संभाजीनगर जिल्ह्यातील तिडका या गावातील पांडुरंग नामदेव गवळी (वय ४७) व निर्मलाबाई नामदेव गवळी (वय ७०) असे मृत झालेल्या मायलेकांचे नाव आहे. याप्रकरणी स्थानिकांनी दिलेल्या माहितीनुसार पांडुरंग गवळी हे काही दिवसांपासून आजारी होते. याच आजारपणात पांडुरंग गवळी यांची प्रकृती अधिक खालावली. या दरम्यान ११ जानेवारीला सायंकाळी सहा वाजेच्या सुमारास पांडुरंग गवळी यांचा मृत्यू झाला. 

बातमी एकताच प्रकृती खालावली 

आपला आजारी मुलगा पांडुरंग याच्या मृत्यूची बातमी आई निर्मला गवळी यांना कळाली. मुलाचं निधन झाल्याची बातमी ऐकत असताना तिला जबर धक्का बसला. यामुळे त्यांची प्रकृती अचानक खालावली. पांडुरंग गवळी यांच्या अंत्यसंस्काराची तयारी करण्यासाठी आलेल्या नातेवाईकांनी तातडीने त्यांना गोदेगाव येथील खाजगी रुग्णालयात उपचारासाठी दाखल केले. मात्र गोदेगाव येथील खाजगी रुग्णालयात निर्मलाबाई यांच्यावर उपचार सुरू असताना रविवारी पहाटे तीन वाजेच्या सुमारास त्यांची प्राणज्योत मालावली. 

मुलावर अंत्यसंस्कार होत असतानाच आईने सोडला प्राण 

दरम्यान ४७ वर्षीय मुलाच्या निधनाच्या धक्क्यातून आईने नऊ तासात प्राण सोडले. इकडे मुलावर अंत्यसंस्कार होत असताना आईने रुग्णालयात प्राण सोडले. दरम्यान निर्मलाबाई गवळी यांच्यावर रविवारी दुपारी बारा वाजता अंत्यसंस्कार करण्यात आले. नऊ तासाच्या अंतराने मायलेकाचा मृत्यू झाल्याच्या घटनेमुळे तिडका गावात शोककळा पसरली आहे.