Satara News : मराठा आरक्षणाच्या मागणीसाठी सातारा जिल्हाधिकारी कार्यालयासमाेर बसलेल्या उपाेषणकर्त्यांच्या प्रकृतीची तपासणी करण्यासाठी वेळेत वैद्यकीय अधिकारी उपलब्ध हाेत नसल्याने आज (साेमवार) मराठा आंदाेलकांनी जिल्हा शल्यचिकित्सक यांच्यावर राेष व्यक्त केला. दरम्यान वाई खंडाळा महाबळेश्वरचे आमदार मकंरद पाटील यांना ग्रामीण भागात आंदाेलकांनी काळे झेंडे दाखवत आरक्षणाची मागणी केली. (Maharashtra News)

वाई विधानसभा मतदार संघाचे राष्ट्रवादीचे आमदार मकरंद पाटील हे मोळी टाकण्याच्या कार्यक्रमासाठी निघाले असताना संतप्त आंदोलकांनी आमदार मकरंद पाटील यांना काळे झेंडे दाखवले. त्यानंतर आंदोलकांना पोलिसांनी ताब्यात घेतले.

मांढरदेव येथे राजकीय नेते, पुढाऱ्यांना गावात येण्यास बंदी घालण्यात आली आहे. यामुळे राजकीय नेत्यांना आता मांढरदेवी गडावरील काळुबाईचे दर्शन घेता येणार नाही अशी चिन्हे निर्माण झाली आहेत. दरम्यान मराठा आंदोलकांनी वाई खंडाळा महाबळेश्वर राष्ट्रवादीचे आमदार मकरंद पाटील यांच्या काल झालेल्या वाढदिवसाच्या बँनरला भुईंज येथील भवानी वार्डात काळे फासले.

Edited By : Siddharth Latkar