भोकरदन विधानसभा मतदारसंघात भाजप उमेदवाराचा बोलबाला दिसत आहे. त्यात संभाव्य आमदार म्हणून संतोष दानवे यांचं नाव समोर येत आहे. या मतदारसंघात भाजप विरुद्ध शरद पवार गट अशी लढत रंगली आहे. राष्ट्रवादी शरद पवार गटाकडून चंद्रकांत दानवे यांना उमेदवारी मिळाली आहे. त्यामुळे दानवे विरुद्ध दानवे असा सामना याठिकाणी रंगत आहे.

भोकरदन विधानसभा मतदारसंघात भाजपचे संतोष दानवे यांना संभाव्य आमदार म्हणून मतदारांचा कौल असल्याचं सकाळच्या एक्झिट पोलच्या संभाव्य आकडेवारीमधून समोर आलं आहे. ते सध्या या ठिकाणीचे विद्यमान आमदार देखील आहेत.

यावेळी महाराष्ट्रात सर्वाधिक 32 उमेदवार भोकरदन मतदारसंघातून निवडणुकीच्या रिंगणात होते. त्यात संतोष दानवे आणि चंद्रकांत दानवे यांच्यात अतिटतीची लढत याठिकाणी झाली. संतोष दानवे हे मागच्या दोन वेळेपासून याठिकाणी आमदार असल्याने त्यांनी केलेली विकासकाम पाहता मतदारांकडून त्यांना पसंती मिळत आहे. त्यामुळे यंदाच्या निवडणुकीत देखील भोकरदनमध्ये भाजपचे पारडे जड राहील असाच अंदाज आहे.