कोल्हापूरच्या आदमापूर येथील श्री संत बाळूमामा देवस्थान हे लाखो भाविकांच्या श्रद्धेचं केंद्र आहे. मात्र, याच देवस्थानात तब्बल 60 कोटी 75 लाख 28 हजार 60 रुपयांच्या घोटाळ्याचा पर्दाफाश साम टिव्हीनं केला. त्यानंतर आता कारवाईचा धडाका सुरू झालाय. या घोटाळ्याप्रकरणी दोन जणांवर गुन्हे दाखल करण्यात आले आहेत.

घोटाळ्यातील आरोपी कुठे गायब?

यात तत्कालीन धर्मादाय निरीक्षक रागिणी खडके, ट्रस्टचे तत्कालीन सचिव रावसाहेब कोणकेरी यांच्यासह संबंधित विश्वस्त आणि मध्यस्थांचा समावेश आहे. या सर्व अरोपींची बाजू ऐकून घेण्याचा साम टीव्हीनं प्रयत्न केला. मात्र अटकेच्या भीतीमुळे हे सर्व आरोपी गायब असून नॉट रिचेबल असल्याचं पुढं आलंय. त्यामुळे आता या देवस्थानातल्या कोट्यवधींच्या घोटाळ्याचा आर्थिक गुन्हे शाखेकडून सखोल तपास करण्यात येतोय.

बाळूमामा देवस्थानातील घोटाळा काय?

अवघ्या 20 लाखांची जमीन दुरुस्ती दस्ताद्वारे थेट 3 कोटी रुपयांना दाखवून निधी लाटला

देवस्थानाच्या 23 जमिनींची मालकी आणि कागदपत्रांमध्ये मोठे घोळ आढळले आहेत

दानपेटी, पशुधन विक्री व इतर मार्गाने येणाऱ्या कोट्यवधींच्या देणगीचा कोणताही अधिकृत हिशोब नाही

भाविकांनी अर्पण केलेल्या सोन्या-चांदीच्या दागिन्यांचे वजन, नोंद व विक्रीची माहिती गहाळ आहे

उत्पन्न आणि खर्च वेगळा दाखवून आर्थिक फेरफार करण्यासाठी दोन स्वतंत्र नोंदवह्या वापरल्या गेल्या

बनावट कागदपत्रे तयार करणे आणि पुराव्यांमध्ये फेरफार केल्याचं स्पष्ट झालंय.

साम टिव्हीच्या बातमी दखल घेत गुन्हे दाखल होऊन 15 दिवस उलटून गेले तरी या संबंधित व्यक्तींना अटक का झालेली नाही असा सवाल आता भाविकांकडून विचारला जातोय. त्यामुळे नेमक्या कुणाच्या आशीर्वादानं हे आरोपी मोकाट आहेत? कोणत्या बड्या धेंडांनी पोलिसांचे हात बांधलेले आहेत? कोणता बडा मासा यामागे आहे ? या सर्व प्रश्नांची उत्तर एसआयटी शोधणार का? हा खरा प्रश्न आहे.