मावळ : उपचार घेत असताना एका महिलेचा मृत्यू झाल्यांनतर मयत महिलेच्या नातेवाईकाने हॉस्पिटलमधील डॉक्टरांना शिवीगाळ आणि कर्मचाऱ्यांना मारहाण करत हॉस्पिटलमध्ये तोडफोड केल्याचा संतापजनक प्रकार घडला आहे. सदर घटना देहूच्या युनिकेअर हॉस्पिटल मध्ये घडली आहे. मारहाणीचा आणि तोडफोडीचा हा सर्व प्रकार सीसीटीव्हीत कैद झाला आहे. याप्रकरणी तुषार सुरेश चव्हाण याच्या विरोधात, डॉ.सुहास जोशी यांच्या फिर्यादीवरून देहूरोड पोलिसात गुन्हा दाखल करण्यात आला आहे.

हे देखील पहा :

घटनेचे सविस्तर वृत्त असे की, आरोपी तुषार याची आजी बेशुद्ध पडल्याने बेशुद्ध अवस्थेत त्यांना युनिकेअर हॉस्पिटलमध्ये आणले होते. उपचार सुरू असताना तुषारच्या आजीचा मृत्यू झाला. याबाबत फिर्यादी डॉ. सुहास जोशी यांनी नातेवाईकांना माहिती दिली. त्यानंतर तुषार याने हंबरडा फोडून हॉस्पिटलमध्ये गोंधळ घातला. मोठमोठ्याने आरडा ओरड करून हॉस्पिटलची शांतता भंग करून, ड्युटीवर उपस्थित डॉ. संदीप पवार आणि डॉ.आनंद दुगड यांना शिवीगाळ करून अंगावर धावून गेला.

यावर न थांबता मयत आजीच्या नातवाने, हॉस्पिटलच्या काचेचा दरवाज्यावर जोराची लाथ मारली. बीपी मोजण्याचे मशीन फेकून त्याचे नुकसान केले. हॉस्पिटलमध्ये गोंधळ करून गणपती चे डेकोरेशन तोडून टाकले असल्याचे फिर्यादीत म्हटले आहे. कर्तव्यावर असलेल्या डॉक्टरांना मारहाण करण्याचे प्रकार वाढलेत, त्यामुळे वैद्यकीय सेवा देणारे हात ही भीतीने थरथर कापत आहेत. एखादा अतिदक्षता विभागातील रुग्ण उपचारासाठी दवाखान्यात आला तर त्याच्यावर उपचार करायचे की नाही, हाच प्रश्न या डॉक्टर मंडळींसमोर उभा राहिला आहे.

Edited By : Krushnarav Sathe