जितेश कोळी

रत्‍नागिरी : दुर्मिळ वन्यप्राणी असलेल्या खवले मांजराच्या खवल्यांची तस्करी करणाऱ्या तिघांना पोलीस व वन विभागाच्या (Forest Department) पथकाने सापळा रचून पकडले आहे. यात तीन आरोपींना अटक करत गुन्हा (Crime) दाखल केला आहे. (Breaking Marathi News)

खेड- मंडणगड (Ratnagiri) मार्गावरून खवले मांजरांच्या खवल्यांची तस्करी होणार असल्याची माहिती खेडचे पोलीस उपनिरीक्षक हर्षद हिंगे यांना मिळाली होती. त्यानुसार खेड व मंडणगड पोलीस (Police) आणि मंडणगड वन विभागाचे संयुक्त पथक तयार करून लाटवन येथील घाटात आरोपींना रंगेहाथ पकडण्यासाठी सापळा रचण्यात आला.

दुचाकीवरून जाणाऱ्या तिघांना पथकाने थांबवून त्यांची तपासणी केली. त्यांच्याकडे 4 किलो 372 ग्रॅम वजनाचे खवले मांजराची खवले मिळून आली. यावेळी घटनास्थळी आलेली एक चारचाकी वाहनाने अंधाराचा फायदा घेत तेथून पळ काढला. या कारवाईत पोलिसांनी तिघांना अटक केली असून त्यांच्यावर वन्य जीव संरक्षण अधिनियमांतर्गत गुन्हा दाखल केला आहे. मंडणगडचे वनपाल अनिल दळवी यांच्या मार्गदर्शनाखाली ही कारवाई करण्यात आली.