भरत मोहोळकर, साम टीव्ही प्रतिनिधी

मुंबई : एका तरुणाला स्वप्न पडतं. स्वप्नात एक मृत व्यक्ती वाचवण्याची विनंती करतो. वारंवार पडणारं स्पप्न तरुण पोलिसांना सांगतो आणि पोलिस FIR दाखल करतात. त्यानंतर सुरू होतो पोलिसांचा तपास. या तपासात कुजलेला मृतदेह आढळून येतो. ही घटना कुठल्या सस्पेन्स हॉरर-थ्रिल चित्रपटातील नाही तर कोकणातील रत्नागिरीच्या खेडमधून समोर आलीय.

नाव- योगेश पिंपळ आर्या. या 30 वर्षीय तरुणाला वारंवार एक स्वप्न पडतं. त्यात खेड रेल्वे स्टेशनजवळच्या डोंगरात एका पुरुषाची डेड बॉडी मला वाचवा, अशी याचना करते. त्यामुळे योगेश पिंपळ आर्या 17 सप्टेंबरला रत्नागिरीच्या खेड पोलिसांत तक्रार दाखल करतो. पोलिसही योगेशच्या तक्रारीवरून गुन्हा दाखल करून घेतात. पोलीस योगेशवर विश्वास ठेवत या परिसराची कसून तपासणी करतात. मात्र त्यांच्या समोर आलेल्या दृश्यानं पोलीसही चक्राऊन जातात.

या कुजलेल्या मृतदेहाजवळ कोणत्या वस्तू आढळून आल्यात पाहूयात....

मृतदेहाजवळ आढळलेल्या वस्तू

काळ्या रंगाची वायर, प्लॅस्टिकच्या पट्ट्या बांधून टॉवेलने गळफास

अंगात राखाडी रंगाचं जॅकट आणि पँट

पायाजवळ आदिदास कंपनीची सॅक

मृतदेहापासून 5 फुटावर कवटी

खेडमध्ये आढळून आलेला मृतदेह बऱ्याच दिवसांचा असल्याचं दिसून येतंय. मात्र हा मृतदेह कुणाचा आहे? याची उकल होणं बाकी आहे. मात्र पडलेल्या स्वप्नामुळे मृत्यूचं गूढ उलगडलं असला तरी ही आत्महत्या की हत्या? हा प्रश्न अनुत्तरीत आहे. त्यामुळे पोलिस तपासात काय समोर येणार? याकडे लक्ष लागलंय.