बीड : बीडच्या माजलगावमध्ये काळ्याबाजारात तांदूळ घेऊन जाणारा ट्रक पकडण्यात आलाय. यामध्ये 27 टन तांदळासह तब्बल 32 लाखांचा मुद्देमाल जप्त करण्यात आला आहे. माजलगाव तालुक्यातील ब्रम्हवाडी येथील युसूफ इसाक आतार हा व्यक्ती रेशनच्या अन्नधान्याचा काळाबाजार करत असल्याची माहिती, सहाय्यक पोलीस अधीक्षक पंकज कुमावत यांना मिळाली.

हे देखील पहा :

त्यानंतर त्यांनी माजलगाव ठाण्याच्या पोलिसांसोबत या ठिकाणी छापा घातला. यावेळी पत्र्याच्या शेडमध्ये तांदळाचे 50 किलोचे तब्बल 558 कट्टे आढळून आले आहेत. हे तांदळाचे कट्टे गुजरात येथे विक्रीसाठी ट्रक मध्ये भरण्याचे काम सुरू होते. यावेळी पोलिसांनी चौकशी केली असता युसूफ याला समाधानकारक उत्तर देता आले नाही. संशय वाढल्याने पोलिसानी त्याचा माल तपासणी केला असता हा सगळा रेशनचा तांदूळ असल्याचे निष्पन्न झाले आहे.

दरम्यान, या कारवाईत पोलिसांनी 6 लाख 98 हजार रुपयांच्या तांदळासह, 25 लाख रुपयांचा ट्रक असा एकूण 31 लाख 98 हजारांचा मुद्देमाल जप्त केलाय. तर आरोपी युसूफ इसाक आतार अटक करत त्याच्यावर माजलगाव ग्रामीण पोलीस ठाण्यात गुन्हा दाखल करण्यात आला आहे.\

Edited By : Krushnarav Sathe