माधव सावरगावे

औरंगाबाद : महाराष्ट्रासाठी ही आनंदाची बातमी आहे. यंदाचा पावसाळा मागील दोन वर्षासारखाच पाणीदार असणार आहे. कारण पावसाळ्यातले चारही महिने चांगल्या पावसाचे असतील असा अंदाज आस्ट्रेलियन हवामान खात्यानं वर्तविला आहे.

यंदाच्या पावसाळ्यातले चारही महिने पाऊस धोधो बरसणार आहे. अचूक अंदाजासाठी प्रसिद्ध असलेल्या ऑस्ट्रेलियन हवामान खात्यानं हा अंदाज वर्तवलाय. जूनच्या सुरुवातीपासूनचं यंदा पाऊस असणार आहे. त्यानंतर जुलै, ऑगस्ट आणि सप्टेंबर महिन्यातही सामान्यांपेक्षा चांगला पाऊस होण्याचा अंदाज आहे. त्यापुढच्या काळात मागच्या वर्षासारखी अतिवृष्टीची शक्यता आहे. या अंदाजामुळे शेतकऱ्यांना मोठा दिलासा मिळणार आहे.

गेल्या दोन वर्षांत महाराष्ट्रात सामान्यांपेक्षा जास्त पाऊस पडला. त्यापूर्वी मात्र, सलग ८ वर्ष मराठवाडा, विदर्भ आणि उत्तर महाराष्ट्रातील अनेक भागात दुष्काळी स्थिती निर्माण झाली होती. यावर्षीच्या अंदाजात मात्र, दुष्काळासारखी भयावह स्थिती निर्माण होणार नाही. आता ऑस्ट्रेलियन हवामान खात्याच्या अंदाजापाठोपाठ भारतीय हवामान खात्याकडून अंदाज येणार आहे. आता सध्याच्या अंदाजानुसार ९८ ते १०४ टक्के पावसाचा अंदाज आहे.

पाऊस चांगला झाला की पाण्याचा प्रश्न मिटतो. शेती उत्पादनात वाढ होते, अर्थव्यवस्थेला गती मिळते. त्यामुळे यंदाचा पावसाळा चांगल्या पावसाचे शुभसंकेत घेऊन येतोय.