• खोपोलीतील धबधब्यावर रिल्स बनवताना तरुणाचा मृत्यू

• धबधब्यावर पाय घसरून दरीत पडला

• पावसाळी पर्यटनासाठी मित्रांसोबत गेला होता

• रिल्स बनवण्याच्या नादात तरुणाने जीव गमावला

सचिन कदम, रायगड

ठाण्यातील तरुणीचा खोपोलीमध्ये खोल दरीत पडून मृत्यू झाला. या तरुणाचा पाय घसरला आणि तो दरीत पडला. गंभीर जखमी झालेल्या तरुणाचा जागीच मृत्यू झाला. ही घटना रायगडच्या खोपोलीमधील एका धबधब्यावर घडली. रविवार असल्याने हा तरुण आपल्या मित्रांसोबत फिरण्यासाठी गेला होता. त्याच्या मृत्यूमुळे कुटुंबीयांना आणि मित्रांना मोठा धक्का बसला. रिल्स बनवण्याच्या प्रयत्नात ही घटना घडली त्यामुळे हळहळ व्यक्त केली जात आहे.

सोशल मीडियावरील रिलसाठी फोटो आणि व्हिडीओ काढण्याच्या नादात ठाण्यातील एका तरुणाचा दुर्दैवी मृत्यू झाला. रायगडच्या खोपोलीतील धबधब्यावर पाय घसरून हा तरुण खोल दरीत कोसळला. अभिषेक कुशवाह (वय २३ वर्षे) असे मृत तरुणाचे नाव होते. अभिषेक आपल्या ३ मित्रांसोबत रविवारी सुट्टी असल्यामुळे रायगडच्या खोपोलीतील केपी धबधब्यावर पावसाळी पर्यटनासाठी गेला होता.

फोटो व्हिडीओ काढल्यानंतर तो धबधब्यावरून परत निघत असताना त्याचा पाय घसरला आणि तो ४० ते ५० फूट खोल दरीत कोसळला. अभिषेक दरीत कोसळल्यानंतर त्याच्या मित्रांना मोठा धक्का बसला. त्यांनी तात्काळ मदतीसाठी इतरांची मदत मागितली. खोपोलीतील हेल्प फाऊंडेशन या बचाव पथकाने शोध कार्य राबवले. पण तोपर्यंत उशिरा झाला होता. अखेर मध्यरात्री अभिषेकचा मृतदेह सापडला.

धोकादायक ठिकाणी, पावसाळी पर्यटनस्थळी सेल्फी आणि रिल्सचा मोह जीवघेणा ठरू शकतो याच आणखी एक उदाहरण रायगडमध्ये या दुर्घटनेमुळे समोर आले आहे. पोलिसांनी पर्यटनस्थळी जाणाऱ्या तरुण-तरुणींना काळजी घेण्याचे आवाहन केले आहे. अभिषेकच्या मृत्यूमुळे त्याच्या कुटुंबीयांना मोठा धक्का बसला. अभिषेकचा मृतदेह शवविच्छेदनानंतर कुटुंबीयांच्या ताब्यात दिला.