-- राजेश भोस्तेकर

रायगड : राज्य सरकारने घातलेल्या कोरोना निर्बंधाचा पर्यटकांनी चांगलाच धसका घेतलाय. त्यामुळे जिल्ह्यात थर्टीफर्स्ट आणि नववर्ष स्वागतासाठी समुद्रकिनारी येणाऱ्या पर्यटकांची संख्या दरवर्षीच्या तुलनेत रोडावली आहे. त्याचा परिणाम रायगडमधील पर्यटन व्यवसायावर होताना दिसतो आहे. अलिबागसह (Alibag) नागाव, काशीद , किहीम मुरुड भागात पर्यटकांनी केलेले हॉटेल्स, रिसॉर्ट आणि लॉजेसचं बुकिंग रद्द केलं आहे. त्यामुळे व्यावसायिकांचं मोठं नुकसान होत असून त्यांच्यात नाराजीचा सूर  आहे.

हे देखील पहा :

कोरोना (Corona) प्रादुर्भाव कमी झाला असल्याने अनेकांनी 2022 सालाचे धुमधडाक्यात स्वागत रायगडात (Raigad) जाऊन करायचे असा बेत पर्यटकांनी आखला होता. पर्यटकांनी महिनाभर आधीच हॉटेल, कॉटेज, लॉज, रिसॉर्टची आगावू बुकिंग केली होती. मात्र, पुन्हा कोरोनाने डोके वर काढण्यास सुरुवात केल्याने आणि त्यातच ओमीक्रोन हा नवा विषाणूही आला असल्याने राज्य शासनाने नववर्षाच्या पूर्वसंध्येला कडक निर्बंध लागू केले.

मात्र, याचा आर्थिक फटका हा जिल्ह्यातील हॉटेल व्यवसायिकांना बसला असून आगावू केलेल्या बुकिंग पर्यटकांनी कोरोनाच्या नव्या निर्बंधांमुळे रद्द केल्या आहेत. त्यामुळे पर्यटकांनी नववर्षाच्या अनुषंगाने गजबजून जाणारे समुद्रकिनारे काही प्रमाणात सुनेसुने वाटत आहेत.

Edited By : Krushnarav Sathe