सचिन कदम, रायगड

Mahad News: मित्रांसोबत पिकनिकला (Picnic) जाणं दोन तरुणांच्या जीवावर बेतल्याची घटना रायगडमध्ये (Raigad) घडली आहे. मांडले धबधब्यामध्ये बुडून दोन तरुणांचा दुर्दैवी मृत्यू झाला आहे. या दोन्ही तरुणांचा मृतदेह सापडले असून त्यांची ओळख देखील पटली आहे. या घटनेमुळे हळहळ व्यक्त केली जात आहे.

मिळालेल्या माहितीनुसार, महाड तालुक्यातील मांडले गावातील धबधब्यामध्ये बुडून दोन तरुणांचा मृत्यू झाला आहे. सचिन औकिरकर आणि रोहित औकिरकर अशी मृत तरुणांची नावं आहेत. हे दोन्ही तरुण किल्ले रायगडाच्या पायथ्याशी असलेल्या हिरकणी वाडीतील रहिवासी आहेत.

सचिन आणि रोहित हे दोन्ही तरुण आपल्या मित्रांसोबत मांडले धबधब्यावर पिकनिकसाठी गेले होते. याच वेळी धबधब्याखाली मित्रांसोबत मजामस्ती करत असताना हे दोन्ही तरुण पाण्यामध्ये बुडाले. घटनेची माहिती मिळताच स्थानिक गावकऱ्यांनी आणि बचाव पथाकने घटनास्थळी धाव घेतली.

बऱ्याच वेळ शोध घेतल्यानंतर या दोन्ही तरुणांचे मृतदेह बचाव पथकाच्या हाती लागले. दोघांचेही मृतदेह बाहेर काढण्यात आले असून त्यांच्या कुटुंबीयांना कळवण्यात आले आहेत. या तरुणांचे मृतदेह शवविच्छेदनासाठी रुग्णालयामध्ये पाठवण्यात आले आहेत. याप्रकरणाची नोंद महाड तालुका पोलीस ठाण्यात करण्यात आली आहे.