रायगड: महाड तालुक्यातील किल्ले रायगड (Raigad) परिसरात असलेल्या बावळे गावाला दरडीचा धोका निर्माण झाला आहे. बावळे गावच्यावरील भागात आसलेल्या डोंगर माथ्यावर मोठमोठ्या भेगा गेल्या असून, यामुळे गावावर दरड कोसळण्याची भिती निर्माण झाली आहे.  डोंगर भागात गुरे चारण्यासाठी जाणाऱ्या गुराख्यांच्या ही बाब निदर्शनास आली आहे.  डोंगर माथ्यावरील जमीन भेगाळल्याने ग्रामस्थांमध्ये दरडीची भिती निर्माण झाली आहे.

या घटनेची माहिती प्रशासनाला दिली आहे. सुरक्षेबाबातच्या सूचना ग्रामस्थांना देण्यात आल्या असून ग्रामस्थ सुरक्षित आहेत.  प्रशासन त्यांच्या संपर्कात आहे. अशी माहिती प्रांताधिकारी यांनी दिली आहे.

मागील वर्षी वरंध घाटात कोसळलेले दरडीची माती आणि मोठमोठे दगड घाट रस्त्यात कायम असल्याने प्रवाशी आणि वाहन चालकांच्या जीवाला धोका निर्माण झाला आहे. रायगड (Raigad) आणि पुणे जिल्ह्याला जोडणारा वरंध घाट हा रायगड जिल्ह्यासाठी व्यापारी दृष्ट्या अतीशय महत्वाचा आणि जवळचा रस्ता आहे.  या घाट रस्त्यावर गेली अनेक वर्ष दरड कोसळून पावसाळ्याचे तीन ते चार महिने हा रस्ता वाहतुकीसाठी बंद ठेवला जातो आहे.  पावसाळ्यात कोसळलेल्या दरडीची माती आणि मोठमोठे दगड काढण्यासाठी तसेच रस्ता दुरुस्तीसाठी कोट्यवधी रुपये खर्च केले जातात. मात्र आजही या घाट रस्त्याच्या बाजुला मोठमोठे दगड, माती आणि रस्त्यात खड्डे आहेत.  यामुळे येथून प्रवास करणारे प्रवासी, वाहन चालक यांच्या जीवीतास धोका निर्माण होत आहे.