सातारा - पती पत्नीच्या भांडणाची झळ गावातील 10 घरांना बसून जवळपास 50 लाख रुपयांचे नुकसान झाल्याने संतप्त गावकऱ्यांनी नवऱ्याला चोप दिल्याची घटना पाटण तालुक्यातील माजगाव येथे घडली आहे. पत्नीशी भांडताना स्वतःचे घर जाळताना आजूबाजूच्या दहा घरे जळून खाक झाल्याची घटना सातारा जिल्ह्यातील पाटण तालुक्यातील माजगाव घडली आहे. या घटनेत सुमारे पन्नास लाखाहून अधिक नुकसान झाले आहे.

पोलिसांनी संबंधित पतीवर गुन्हा दाखल केला आहे.पाटण तालुक्यातील माजगाव या गावातील संजय पाटील आणि त्याची पत्नी पल्लवी यांची घरगुती कारणातून भांडण सुरू होती. भांडण एवढ्या टोकाला गेले की पतीने स्वतःच्या घराला आग लावली. आग लावली तेंव्हा घरातील सिलेंडर ने ही पेट घेतला. नंतर या आगीने रुद्र रूप धारण करत आजूबाजूच्या सुमारे दहा घरांना त्याचा फटका बसला आहे . आजूबाजूची सुमारे दहा घरे जळून खाक झाली.

या आगीत सुमारे पन्नास लाखाहून अधिक रुपयांचे नुकसान झाले असून याबाबत संबंधित पतीला पोलिसांनी अटक केली आहे. संबंधित पतीला मल्हारपेठ पोलिसांनी अटक केली असून त्याच्यावर गुन्हा दाखल करण्यात आला आहे. घर जाळणाऱ्या पतीला ग्रामस्थांनी आगीतून बाहेर काढत चांगला चोप दिला.

Edited By - Shivani Tichkule