Eknath Shinde News : राज्याच्या राजकारणात मुख्यमंत्री एकनाथ शिंदे विरुद्ध शिवसेना असा राजकीय रणसंग्राम रंगला आहे. शिवसेनेचे ठाकरे गट आणि शिंदे गट या दोघांच्या राजकीय संघर्षामुळे राज्यातील राजकीय वातावरण तापलं आहे. याचदरम्यान, आळंदीतून मुख्यमंत्री एकनाथ शिंदे (Eknath Shinde) यांना वारकऱ्यांनी साकडं घातलं आहे.

'तुम्ही फक्त पवित्र इंद्रायणी नदी (River) स्वच्छ करा, तर तुमच्या केसाला धक्का लागणार नाही, असं आवाहन तरुण वारकऱ्यांने मुख्यमंत्री एकनाथ शिंदे यांना भरसभेत केले.

आज, शनिवारी मुख्यमंत्री एकनाथ शिंदे यांनी आळंदीत एका कार्यक्रमात वारकऱ्यांशी संवाद साधला. यावेळी वारकऱ्यांशी संवाद साधताना एकनाथ शिंदे म्हणाले, माणसामध्ये स्पर्धा असावी. मात्र, ती स्पर्धा लोकं हितासाठी असावी. स्वत: साठी नसावी. म्हणून आम्ही जो स्पर्धा घेण्याचा कार्यक्रम ती महिन्यांपूर्वी केला. तो कार्यक्रम लोकांच्या हितासाठी होता. स्वत:च्या हितासाठी नाही'.

'आषाढी वारीला पांडुरंगाची पूजा करायला मिळणं हे भाग्य आहे. अनेक जन चिंता करत होते. पण आम्ही आमच्या निर्णयावर समाधानी होतो. वारकऱ्यांनी आम्हाला स्वीकारलं. तेव्हाच आम्हाला कळलं होतं', असे मुख्यमंत्री शिंदे पुढे म्हणाले. आळंदीला देखील विकास करायचा आहे. मोठी विकास कामे करायची आहेत, असे आश्वासन देखील मुख्यमंत्र्यांनी दिले.

दरम्यान, पवित्र इंद्रायणी गटारगंगा म्हणून दुर्गंधीत झाली आहे. या इंद्रायणीच्या पावित्र्यासाठी आज भर सभेत वारकरी संप्रदायाचे शिक्षण घेणारा विद्यार्थी उभा रहिला. तुम्ही फक्त पवित्र इंद्रायणी नदी स्वच्छ करा, तर तुमच्या केसाला धक्का लागणार नाही, असं आवाहन तरुण वारकऱ्याने मुख्यमंत्र्याला केले. त्यांच्या बेधडक सुचनेला मुख्यमंत्री एकनाथ शिंदे यांनी देखील प्रतिसाद दिला. इंद्रायणीसाठी स्वच्छता मोहिम हाती घेणार असल्याचे आश्वासन मुख्यमंत्र्यांनी दिले. या घटनेचा व्हिडिओ सोशल मीडियावर व्हायरल झाला आहे.