रोहिदास गाडगे/ संजय राठोड 
पुणे/ यवतमाळ : एकवेळ लसणाचे दर गगनाला भिडले होते. मात्र यात मागील काही दिवसांपासून घसरण होत असल्याचे पाहण्यास मिळत आहे. साडेपाचशे रुपये प्रतिकिलो इतके लसूणच्या दर पोहचले असताना यात चारशे रुपयांची घसरण होऊन बाजारात हे दर १०० ते १२० रुपयांवर गेले आहेत. तर पुण्याच्या नारायणगाव बाजारात टोमॅटोला कवडीमोल भाव मिळत आहे. 

उत्तर पुणे जिल्ह्यातील जुन्नर आंबेगाव खेड शिरुर तालुक्यात बाराही महिने टोमँटोचे उत्पादन घेतलं जाते. हा टोमँटो उत्तर भारतात मोठ्या प्रमाणावर निर्यात होतो. टोमँटोवर मोठा भांडवली खर्च करुन उत्पादित केला जातो. मात्र आता उत्पादन खर्चाच्या तुलनेत टोमँटोला मिळणारा बाजारभाव ४० टक्क्यांनी तोट्यात असल्याने शेतकरी हतबल झाला आहे. परिणामी टोमॅरोवर करण्यात आलेला खर्च देखील निघणे कठीण झाले आहे.    

दोनशे रुपयांपर्यंत घसरण 

दोन महिन्यापुर्वी टोमँटोला ५०० ते ६०० रुपयांचा बाजारभाव मिळत होता. आता अगदी हे दर १५० ते २०० रुपयांपर्यंत खाली कोसळला आहे. त्यामुळे शेतकऱ्यांचा टोमॅटो तोडणीचा व वाहतुकीचा खर्चही वसूल होत नसल्याने शेतकरी मेटाकुटीला आला आहे. टोमॅटोच्या दरात आणखी घसरण झाल्यास टोमॅटो फेकण्याची वेळ शेतकऱ्यांवर येणार आहे. 

लसूणचे दर १२० रुपयांवर आले खाली

यवतमाळ : मागील काही महिन्यांपासून यवतमाळ जिल्ह्यात लसूणाचे भाव वधारल्याने लसणाची ठसण वाढली होती. लसूण बाजारात साडेपाचशे रुपये किलो दराने विकल्या जात होता. मात्र सध्या स्थितीत लसणाचे भाव १२० रुपये किलो एवढे असल्याने लसणाची ठसण उतरली आहे. लसूण साडेपाचशे रुपये किलोपर्यंत तडकला होता. आता नवीन लसुन बाजारात आल्याने आवक वाढली आहे. त्यामुळे किरकोळ भावात लसूण १२० रुपये प्रति किलो विकला जात आहे.