मुंबई : पुण्यातील स्वारगेट बस डेपोमध्ये २६ वर्षीय तरुणीवर बलात्कार झाल्याची घटना घडली होती. बस स्थानकामध्ये सकाळी पहाटेला दत्ता गाडे या नराधमाने शिवशाही गाडीमध्ये नेत अतिप्रसंग केला होता. या आरोपीला पकडण्यासाठी पोलिसांना तीन दिवस लागले. पोलिसांना गुंगार देणाऱ्या दत्ताला तीन दिवसांनी अटक करण्यात आलीय. शिरूर येथील गुनाट गावच्या शिवारात त्याला अटक झाली. या अटकेनंतर त्याला फाशीची शिक्षा व्हावी अशी मागणी होत आहे. या संपूर्ण प्रकरणावर राज्याचे मुख्यमंत्री देवेंद्र फडणवीस यांनी आपली प्रतिक्रिया दिली आहे.

देवेंद्र फडणवीस काय म्हणाले?

तंत्रज्ञानाचा वापर करून पोलिसांनी आरोपीला शोधून काढलं आहे. लवकरच या घटनेचा पर्दाफाश होईल. त्यासंदर्भात काही माहिती पोलीस आयुत्तांनी दिली आहे. काही माहिती यावेळी देणं योग्य नाही. घटनेचा नेमका घटनाक्रम काय हे योग्य वेळेला तुमच्यापर्यंत पोहोचेल. यावेळी दत्ता गाडेसोबत अक्षय शिंदेसारखी पुनरावृत्ती होणार का? असा प्रश्न विचारला असता, यावर बोलताना फडणवीस म्हणाले की, आता यावर बोलणं खूप लवकर बोलण्यासारखं होईल. आता पोलिसांनी आरोपीला पकडलं आहे. आज कस्टडी मिळेल त्यानंतर चौकशी होईल. काही तांत्रिक आणि फॉरेन्सिक माहिती समोर आली त्या एकत्रित करून यावर बोलणं योग्य राहिलं, असं देवेंद्र फडणवीसांनी यावेळी सांगितलं.

योगेश कदम जे बोलले त्याला वेगळ्या पद्धतीने घेतलं गेलं. म्हणजे माझा असा समज आहे की ते सांगण्याचा प्रयत्न करत होते की, हा लोकं असलेला परिसर असून बस काही आतमध्ये नव्हती, बाहेरच होती. लोकांना प्रतिकारा होताना लक्षात आलं नाही. तथापि ते नवीन आहे युवा मंत्री असून, काहीतरी करण्याचा प्रयत्न करतायेतय पण मी सल्ला देईल की बोलताना संवेदनशीलपणे बोललं पाहिजे. कारण बोलताना काही चूक झाली तर समाज मनावर वेगळा परिणाम होतो. निश्चितपणे जो लोकप्रतिनिधी असतील त्यांनी अशा घटनांवर बोलताना संवेदनशीलपणे बोलावं असा माझा सल्ला असल्याचं देवेंद्र फडणवीस यांनी म्हटलं आहे.