अक्षय बडवे

Pune News:

पुणे शहराला विद्येचं माहेरघर म्हटलं जातं. मात्र आजही अनेक ठिकाणी अंधश्रद्धेच्या अघोरी घटना घडताना पाहायला मिळतात. पुण्यात जमिनीच्या वादातून एका महिलेवर जादूटोणा करणात आला आहे. महिलेची साडी चोरून त्याला लिंबू आणि टाचण्या टोचण्यात आल्यात. या घटनेबाबत महिलेच्या मुलाने पोलिसांत तक्रार दाखल केली आहे. (Latest Marathi News)

मिळालेल्या अधिक माहितीनुसार, पुण्याच्या चतु: श्रृंगी पोलीस स्टेशनच्या हद्दीत हा धक्कादायक प्रकार घडला आहे. तक्रार दाखल केलेल्या मुलाचे काही दिवसांपूर्वी त्याच्या कुटुंबातील अन्य नातेवाईकांसोबत भांडण झाले होते. तरुणासोबत भांडण झाल्याच्या रागातून नातेवाईकांनी त्याला आणि त्याच्या आईला धडा शिकवण्याचा निर्णय घेतला.

बदला घेण्याच्या रागातून या नातेवाईकांनी तरुणाच्या आईची साडी चोरून नेली. त्यानंतर या साडीवर कुंकू टाकले. तसेच टाचण्या टोचल्या. आईच्या फोटोला देखील लिंबू आणि टाचण्या टोचण्यात आल्या होत्या. अशी तक्रार मुलाने केली आहे.

पोलिसांनी या प्रकरणी दिलेल्या माहितीनुसार, तरुणाची आजी, मामा, सावत्र आई, भाऊ आणि चुलत बहीण यांनी संगमत करून कट रचून प्रॉपर्टीसाठी हा अघोरी प्रकार केला आहे. काही दिवसांपूर्वी फिर्यादी तरुणाने त्याच्या एका नातेवाईकाला मारहाण केली होती. या मारहाणीनंतर एकाच कुंटुंबात वाद होऊन दोन गट तयार झाले.

मारहाणीचा राग मनात धरून नातेवाईकांनी फिर्यादी तरुणाच्या आईसह मावशी, काकू यांच्या देखील साड्या चोरल्या. त्यानंतर साडीवर फोटो ठेवून फोटोच्या आणि साडीच्या बाजुला अंडी, टाचण्या लावलेले लिंबू, भात, कलेजी, मटण, हळद, रुकु, अगरबत्ती ठेवून जादूटोणा केला. पोलिसांनी आरोपींना अटक केली आहे.