Ahmednagar-Pune Highway Accident : भरधाव वेगात येणाऱ्या ट्रकने भाविकांनी भरलेल्या पिकअपला जोरदार धडक दिली. या भीषण अपघातात ३ भाविकांचा जागीच मृत्यू झाला. तर ११ जण गंभीर जखमी झाले. मृत्युमुखी पडलेल्यांमध्ये एका १४ वर्षीय मुलाचा देखील समावेश आहे. अहमदनगर-पुणे महामार्गावरील कामरगाव शिवारात ही दुर्देवी घटना घडली.  (Maharashtra Breaking News)

घटनेची माहिती मिळताच, स्थानिक नागरिकांसह  पोलिसांनी (Police) घटनास्थळी धाव घेतली. पोलिसांनी ३ भाविकांचे मृतदेह ताब्यात घेतले असून जखमींना तातडीने उपचारासाठी अहमदनगर (Ahmednagar) येथील खासगी रुग्णालयात दाखल करण्यात आले आहे. देवदर्शनाहून येणाऱ्या भाविकांवर अचानक काळाने घाला घातल्याने परिसरातून हळहळ व्यक्त होत आहे.

मिळालेल्या माहितीनुसार, अपघातग्रस्त भाविक हे देवगड आणि शनिशिंगणापूरचे दर्शन घेऊन पुण्याच्या दिशेने येत होते. त्याचवेळी पुण्याहून-नगरच्या दिशेने भरधाव वेगात ट्रक येत होता. दरम्यान, दोन्ही वाहने कामरगाव शिवारात आली असता, ट्रकचालकाचे गाडीवरील नियंत्रण सुटले. (Latest Marathi News)

त्यामुळे ट्रक अनियंत्रित होऊन भाविकांच्या पिकअपला धडकला. ही धडक (Accident) इतकी भीषण होती की, यामध्ये ३ भाविकांचा जागीच मृत्यू झाला. तर इतर ११ भाविक गंभीर जखमी झाले. त्यांना उपचारासाठी रुग्णालयात दाखल करण्यात आलं आहे. या घटनेनं मोठी हळहळ व्यक्त होत आहे.

Edited By - Satish Daud