- संजय राठोड

यवतमाळ - बाळंतपणासाठी लागणारे रुग्णालयातील कपडे धुतलेले नसल्याच्या कारणावरून एका गर्भवती महिलेला यवतमाळ मधील वणीच्या ग्रामीण रुग्णालयातून चंद्रपूरला पाठवल्याची संतापजनक घटना पुढे आली आहे. वणी तालुक्यातील वारगाव येथील रंजना नितेश कोल्हे ही महिला बाळंतपणासाठी वणीच्या ग्रामीण रूग्णालयात दाखल झाली. तिला प्रसवकाळा सुरू झाल्याने बाळांतपणाची तयारी करण्यात आली. मात्र, कपडे निर्जंतूक नसल्याने गर्भवती महिलेला चंद्रपूरला जा असे रुग्णालय प्रशासकडून सांगण्यात आल्याची धक्कादायक घटना वणीच्या ग्रामीण रूग्णालयात घडली.

हे देखील पहा :

नैसर्गिकरित्या बाळांतपण करताना जर शस्त्रक्रियेची गरज पडली. तर त्यासाठी लागणारे कपडे अगोदर धुवून निर्जंतुक करावे लागतात. मात्र, या प्रक्रियेसाठी लागणारे रूग्णालयातील कपडेच धुवून नसल्याचे रूग्णालयातील कर्मचाऱ्यांकडून सांगण्यात आले. त्यातच गर्भवती रंजना कोल्हे या महिलेला प्रसवकळा ही सुरू झाल्या. त्यामुळे ऐनवेळी तिला वणी ग्रामीण रूग्णालयातील कर्मचाऱ्यांनी भर्ती न करता चंद्रपूरला ला जाण्यास सांगण्यात आले. हा सर्व प्रकार शिवसेना पदाधिकारी राजू तुराणकर ह्यांना समजल्या नंतर त्यांनी आधी गर्भवती महिलेला चंद्रपूर ला प्रसूती करता हलविले आणि त्यानंतर ग्रामीण रुग्णालयाचा चांगलाच समाचार घेतला.

संतापजनक घटना वणी ग्रामीण रूग्णालयात घडल्यानंतर राजू तुराणकर यांनी आरोग्य संचालक, उपायुक्त, व जिल्हा शल्य चिकित्सकांना फोन करून घडलेला प्रकाराची माहिती देत या प्रकरणात दोषींविरुद्ध कडक कारवाई ची मागणी केली. दरम्यान, दोषींविरुद्ध कारवाई न केल्यास जिल्हा शल्य चिकित्सक कार्यालयापुढे आंदोलनाचा इशारा शिवसेनेकडून देण्यात आला आहे. त्यामुळे संबधित कर्मचाऱ्यावर कोणती कारवाई होते या कडे लक्ष्य लागले आहे.

Edited By : Krushnarav Sathe