छत्रपती संभाजीनगर : राज्यात आरक्षणाचा मुद्दा ऐरणीवर आला आहे. एकीकडे मराठा समाजाने ओबीसीतून आरक्षणाची मागणी लावून धरली आहे. या मागणीला ओबीसी समाजाचा विरोध आहे. या आरक्षणाच्या मुद्यावरून प्रकाश आंबेडकर यांनी भूमिका स्पष्ट केली आहे. प्रकाश आंबेडकर यांनी ओबीसी आरक्षणासाठी १८ जुलैपासून आरक्षण बचाव यात्रा काढणार असल्याचे जाहीर केले.

प्रकाश आंबेडकर यांनी छत्रपती संभाजीनगरमध्ये पत्रकार परिषद घेतली. या पत्रकार परिषदेत आंबेडकर म्हणाले, ' आम्ही १८ जुलैपासून ओबीसी बचाव यात्रेला सुरुवात करणार आहोत. कोल्हापूर ते छत्रपती संभाजीनगर असा प्रवास असेल. अनेक ओबीसी संघटनांनी विनंती केली की, ओबीसींचा लढा हातात घ्या. आताची परिस्थिती भयानक होत आहे. नामांतराची आठवण येईल, असे सुरु आहे. पुरोगामी महाराष्ट्राच्या दृष्टीने ओबीसी विरुद्ध मराठा असा वाद श्रीमंत मराठ्यांनी लावला आहे. त्यामुळे ओबीसी नेत्यांना भीती आहे'.

'मनोज जरांगे यांनी आंदोलन सुरु केलं आहे. दुसऱ्या बाजूस सर्वपक्षीय बैठक बोलावण्यात आली होती. या बैठकीला सर्व मराठा नेते, एनसीपी, काँग्रेस आणि ठाकरे गटाचे कुणीच उपस्थित नव्हते. ठाकरे गट, काँग्रेस आणि एनसीपीपर्यंत जोपर्यंत भूमिका मांडत नाहीत. तोपर्यंत तोडगा निघणार नाही. सामाजिक संघटना घेऊन २५ जुलैपासून दादर चैत्यभूमीवरून सुरुवात करायची. २६ जुलैपासून शाहू महाराजांनी आरक्षणाची घोषणा केली होती. त्यामुळे शाहू महाराजांना नतमस्तक होऊन यात्रा काढण्याचे ठरवले आहे. या यात्रेची सांगता ७ किंवा ८ ऑगस्टला छत्रपती संभाजीनगरमध्ये होणार आहे, असे आंबेडकरांनी सांगितले.

'मनोज जरांगे पाटील यांचे गरीब मराठ्यांसाठी आंदोलन सुरु आहे. सत्ता ही श्रीमंत मराठ्यांची आहे. ते गरीब मराठ्यांना आरक्षण मिळू देत नाहीत. सगेसोयरे हे भेसळ आहे. आताच्या मिळालेल्या नोंदीवरून मराठा समाजाला कुणबी प्रमाणपत्रे दिली आहेत. ती रद्द करावीत. तपसाले गेले नाहीत. त्यांना स्वत: अर्ज केलेला नाही, असेही त्यांनी सांगितले.