सांगली जिल्ह्यातील वाळवा तालुक्यातील वाटेगाव येथे शनिवारी झालेल्या बिरोबा मंदिर सभा मंडपाच्या उद्घाटन सोहळ्यात भावनिक वातावरण पाहायला मिळाले. या कार्यक्रमात व्यासपीठावर आमदार सदाभाऊ खोत आणि आमदार गोपीचंद पडळकर हे दोन्ही नेते उपस्थित होते. सभागृहात हजारो प्रेक्षक, कार्यकर्ते आणि ग्रामस्थ उपस्थित असताना अचानक सदाभाऊ खोत यांच्या डोळ्यात अश्रू दाटून आले. “माझ्या शरीरात रक्ताचा थेंब असेपर्यंत, शेवटच्या श्वासापर्यंत मी गोपीचंद पडळकरांच्या पाठीशी उभा राहणार आहे,” असे उद्गार त्यांनी काढले आणि संपूर्ण वातावरण भावनिक झाले.

सदाभाऊ खोत म्हणाले की, “मी आणि गोपीचंद पडळकर आम्ही दोघे मिळून प्रस्थापित सत्ताधाऱ्यांविरोधात नेहमी लढत आलो आहोत. समाजातील सर्व जाती-धर्मातील वंचित, दुर्लक्षित लोकांच्या प्रश्नांना न्याय देण्यासाठी आम्ही सदैव आक्रमक पवित्रा घेतला आहे. त्यामुळेच विरोधकांचा आमच्यावर राग आहे. पण आमचा उद्देश नेहमी स्वच्छ आणि समाजहिताचा राहिला आहे.” गोपीचंद पडळकर व्यासपीठावर बसलेले असताना सदाभाऊ खोत यांनी केलेल्या या भावनिक भाषणाने पडळकर देखील भारावून गेलेले दिसले.

सदाभाऊ खोत यांनी पुढे असेही म्हटले की, “ वंचित लोकांचे प्रश्न जर कुणी खऱ्या अर्थाने मांडले असतील, तर ते आम्हीच. नाहीतर या लोकांकडे मायेने कुणी बघत नाही. प्रस्थापितांना आमचा विरोध पटत नाही, कारण आम्ही त्यांच्या राजकारणाला आव्हान दिले आहे. पण आम्ही मागे हटणार नाही. गोपीचंद पडळकर हे समाजातील अशा घटकांचे प्रश्न धडाडीने मांडतात, म्हणून त्यांच्यावर सतत टीका होते. तरीसुद्धा त्यांची भूमिका आक्रमक आणि स्पष्ट आहे.”

या निमित्ताने राजकीय व्यासपीठावर सदाभाऊ गोपीचंद यांच्या मैत्रीची झलक अनुभवायला मिळाली. दोन्ही नेत्यांनी आपल्या भाषणातून कार्यकर्त्यांना एकतेचा आणि समाजहिताचा संदेश दिला. सांगली आणि वाळवा तालुक्यातील राजकारणात सदाभाऊ खोत आणि गोपीचंद पडळकर यांची जोडी नेहमीच चर्चेत असते.