Ramdas Kadam : मुख्यमंत्री एकनाथ शिंदे यांची आज खेडमधील गोळीबार मैदानात जाहीर सभा आहे. या सभेसाठी महिन्याभरापासून शिंदे गटातील नेत्यांनी कंबर कसली होती. माजी मुख्यमंत्री उद्धव ठाकरे यांनी देखील काही दिवसांपूर्वी खेडच्या गोळीबार मैदानत सभा घेतली होती. तेथेच आता शिंदे गटाची जाहीर सभा होत आहे. (Political News)

या सभेमध्ये मुख्यमंत्री एकनाथ शिंदे काय बोलणार याकडे साऱ्यांचे लक्ष लागले आहे. शिवसेनेच्या याच जाहीर सभेनिमित्त सध्या रामदास कदम जोरदार चर्चेत आले आहेत. त्यांच्या समर्थकांनी खेडमध्ये जोरदार बॅनरबाजी करून विरोधकांना डीवचण्याचा प्रयत्न केल्याचे पाहायला मिळत आहे.

कितीही लांडगे आले तरी वाघाची शिकार करू शकत नाहीत, कारण बाप हा बापच असतो. विरोधकांच्या पोटात नुसती आग, कारण मैदानात उतरला ढाण्या वाघ आशा आशयाचे बॅनर सर्वत्र लागले आहेत. त्यामुळे आजच्या जाहीर सभेत रामदास कदम यांची तोफ धडाडणार असल्याची चर्चा या बॅनरबाजीमुळे सुरू झाली आहे.

मुख्यमंत्री शिंदे यांच्या सभेची जय्यत तयारी सुरू आहे. हजारोंच्या संख्येने गोळीबार मैदानात खुर्च्या मांडण्यात आल्या आहेत. तसेच भव्य स्टेज बांधल्याचे या ठिकाणी पाहायला मिळत आहे. इथे बसलेल्या प्रत्येक व्यक्तीला मुख्यमंत्र्यांचे भाषण हे ऐकता यावे आणि पाहता यावे या अनुषंगाने एलईडी स्क्रीन देखील उभारण्यात आलेत. मैदानाच्या चारही बाजूने भगवे झेंडे लावण्यात आले आहेत.