लातूर - जिल्ह्यातील औसा येथील पोलीस (Police) स्टेशनमधील पोलीस हवालदार यांनी एका प्रकरणात मदत करण्यासाठी पाच हजारांची लाच (Bribe) मागितली. त्यातील तीन हजार रुपये स्वीकारताना लाचलुचपत प्रतिबंधक विभागाने त्यांना अटक केली असून गुन्हा दाखल करण्यात आला आहे. या संदर्भात अधिक माहिती अशी की, औसा पोलीस ठाण्यातील पोलीस हवालदार राजेंद्र गोरख लामतुरे यांनी एका प्रकरणात तक्रारदार यांना मदत करतो म्हणून पाच हजारांची मागणी केली. त्यातील तीन हजार रुपये स्वीकारताना लामतुरे यांना अटक करण्यात आली आहे.

हे देखील पाहा

औसा पोलिसात भादवि 294, 323, 506 प्रमाणे दाखल असलेल्या गुन्ह्यात मदत करण्यासाठी पोलीस हवालदार लामतुरे यांनी तक्रारदारास पाच हजार रुपयांच्या लाचेची मागणी केली. तडजोडी अंती पहिला हप्ता 3 हजार व दुसरा हप्ता 2 हजार अशी लाच मागितली. शुक्रवारी पाच वाजण्याच्या सुमारास लामतुरे यांनी तक्रारदार यांच्याकडून तीन हजार रुपयांची लाच पंचासमक्ष स्वीकारली. ही लाच स्वीकारताना लाचलुचपत प्रतिबंधक विभागाने त्यांना रंगेहाथ पकडले. सापळा अधिकारी म्हणून पोलीस निरीक्षक अन्वर मुजावर व लाचलुचपत प्रतिबंधक विभागाच्या टीमने ही कारवाई केली आहे. पुढील तपास अन्वर मुजावर करीत आहेत.