पिंपरी चिंचवड : शेअर मार्केटच्या नावाने फसवणूक करण्यात आल्याचे अनेक प्रकार समोर आले आहेत. असाच प्रकार समोर आला असला असून तीन जणांना पोलिसांनी ताब्यात घेतले आहे. विशेष म्हणजे या तिन्ही जणांना पुणे जिल्ह्यात आणून बनावट कागदपत्रांच्या माध्यमातून फसवणूक करण्यात आल्याचे समोर आले आहे. 

शेअर मार्केटमध्ये गुंतवणूक करण्याच्या नावाने फसवणुकीचे प्रकार अनेकदा समोर आले आहेत. त्यानुसार पुण्यात समोर आलेल्या प्रकरणात सायबर पोलीसांनी शेअर मार्केटच्या नावाने नागरिकांना लाखो रुपयांचा आर्थिक गंडा घालणाऱ्या तीन आरोपींना बेड्या ठोकल्या आहेत. यात रोहीत पटाडीया, विशाल कदम आणि रमजान सदिक चौहान या तीन आरोपींना सायबर पोलीसांनी बेड्या ठोकल्या आहेत. तर मुख्य आरोपी सुरज खेडेकर हा अद्याप फरार असुन त्याचा पोलीस शोध घेत आहेत. 

लाखो रुपयांची फसवणूक 

पोलिसांनी ताब्यात घेतलेल्या या सर्व आरोपी मिळून पिंपरी चिंचवड शहरातील एका गुंतवणूकदाराला ६७ लाख ६९ हजार ९५० रुपये वेगवेगळ्या बँके अकाउंटमध्ये जमा करायला लावले. या माध्यमातून लाखो रुपयाची आर्थिक फसवणूक केल्याचे पोलीस तपासात उघडकीस आले आहे. 

राजस्थानमधून तिघांना आणत फसवणूक 

शेअर मार्केटच्या नावाने लाखो रुपयांचा फायनान्शिअल फ्रॉड करण्यासाठी राजस्थान मधील नागोर गावातील व्यक्तींना पुणे जिल्ह्यात आणून, बनावट कागदपत्रांच्या द्वारे त्यांचे बँक अकाउंट उघडण्यात आल्याचा धक्कादायक प्रकार पिंपरी चिंचवड शहरा सायबर पोलिसांनी उघडकीस आणला आहे.