पिंपरी चिंचवड : शेअर मार्केटमध्ये गुंतवणूक करून जास्त नफा मिळवून देण्याचे आमिष दाखवून जवळपास दीडशे हून अधिक नागरिकांची फसवणूक करण्यात आली आहे. त्यांच्याकडून जवळपास २० ते २५ कोटी रुपये उकळल्याचा धक्कादायक प्रकार पिंपरी चिंचवड शहरातील सायबर पोलिसांनी उघडकीस आणला आहे. या प्रकरणी पाच जणांना ताब्यात घेतले आहे. 

वेगवेगळे आमिष दाखवून फसवणूक करण्याचे प्रकार आता नवीन राहिले नाहीत. शेअर मार्केटमध्ये गुंतवणूक करून जास्तीचा नफा मिळवून देण्याच्या आमिषाला अनेकजण बळी पडत असतात. यातून फसवणूक होत असल्याचे अनेक प्रकार समोर आले आहेत. असाच प्रकार पुन्हा एकदा पिंपरी चिंचवड शहर परिसरात उघडकीस आला असून यात तब्बल १५० हुन अधिक नागरिकांची फसवणूक झाल्याचे समोर आले आहे. 

आयटी अभियंत्याला गंडविले 
काही दिवसापूर्वी एका आयटी अभियांताला शेअर मार्केटमध्ये गुंतवणुकीचे आमिष दाखवून त्याच्याकडून जवळपास ९० लाख रुपये घेऊन त्याला त्या पैशांचे नऊ कोटी रुपये झाल्याचे भासवण्यात आले होते. मात्र त्यानी रक्कम काढण्याचा प्रयत्न केला असता त्याला वेगवेगळे टॅक्स, चार्जेस लागणार असे सांगून त्याची लाखो रुपयांची फसवणूक करण्यात आली. आपली फसवणूक झाल्याचे कळता आयटी अभियंत्याने सायबर विभागात गुन्हा नोंद केला. 

पाच जणांना घेतले ताब्यात 

या गंभीर प्रकारची दखल घेत सायबर पोलिसांकडून तपास केला असता या सर्व घटनेचा छडा लागला आहे. याप्रकरणी पोलिसांनी पाच आरोपींना अटक केली आहे. यामध्ये एका महिला आरोपीचा देखील समावेश आहे. यात यांनी दीडशेहून अधिक लोकांची फसवणूक केल्याची माहिती समोर आली आहे. तर अशाच प्रकारे अजूनही काही नागरिकांना या टोळीने गंडा घातल्याचा संशय पोलिसांना असून पुढील तपास सायबर पोलिस करत आहेत.