पिंपरी चिंचवड : पिंपरी चिंचवड आणि पुणे शहरातुन दुचाकी आणि ऑटो रिक्षा चोरीच्या घटना वाढल्या होत्या. याबाबत सुरु असलेल्या तपासात पिंपरी चिंचवड शहर पोलिसांच्या गुन्हे शाखा क्रमांक दोन पथकाने चोरी करणाऱ्या अट्टल चोरट्याला मुद्देमालासह ताब्यात घेतले आहे. 

शंकर भरत देवकुळे असे पोलिसांनी ताब्यात घेतलेल्या चोरट्याचे नाव आहे. पिंपरी चिंचवड (Pimpri chinchwad) आणि पुणे शहरातील मेट्रो स्टेशन परिसरात गाड्यांचे हॅन्डल लॉक न लावता पार्क केलेल्या वाहनांची शंकर देवकुळे हा बनावट चावी लावून वाहन चोरी करत होता. चोरी केलेली वाहन पैसे मिळवण्यासाठी कमी शिक्षित असलेल्या लोकांना अल्प दरात विक्री करत असल्याचे पोलीस (Police) तपासात उघडकीस आले आहे.

७० चोरीचे गुन्हे दाखल 

दरम्यान शंकर देवकुळे या अटल चोरट्याच्या ताब्यातून पोलिसांनी १३ दुचाकी वाहन आणि दोन ऑटो रिक्षा जप्त केल्या आहेत. शंकर देवकुळे याच्यावर जवळपास ७० वाहन चोरीचे गुन्हे राज्यातील वेगवेगळ्या पोलीस स्टेशनमध्ये दाखल आहेत. त्यात त्याने सर्वात जास्त वाहन चोरीचे गुन्हे पिंपरी-चिंचवड आणि पुणे शहरात केले आहेत.