पिंपरी चिंचवड : दिवाळीच्या दिवशी सर्व परिवार आनंदात होता. दिवाळीच्या रात्री आपल्या कुटुंबीयांसोबत फटाके उडवीत असतानाच तरुणावर काळाने घाला घातला. रस्त्यावरून एका भरधाव वेगाने जाणाऱ्या कार चालकाने ३५ वर्षाच्या तरुणाला जोरदार धडक देऊन उडवील्याची घटना घडली. यात तरुणाचा मृत्यू झाला. 

दिवाळी असल्याने रात्री सर्वजण फटाके उडवत होते. त्यानुसार (Pimpri Chinchwad) पिंपरी चिंचवडच्या रावेत येथील फेलिसिटी सोसायटी समोर सोहम पटेल (वय ३८) हा तरुण आपल्या कुटुंबीयांसोबत फटाके उडवीत असताना एका भरधाव वेगाने जाणाऱ्या चार चाकी वाहन चालकाने त्याला चिरडून पळ काढला आहे. या अतिशय दुर्देवी (Accident) अपघाताची दृश्य सीसीटीव्ही कॅमेरामध्ये कैद झाली आहेत. दिवाळी सारख्या आनंददायी सणाच्या दिवशी पटेल कुटुंबीयवर दुःखाचा डोंगर कोसळला आहे. 

तो कार चालक सापडेना 

धक्कादायक बाब म्हणजे हा अपघात होऊन जवळपास ४८ तास झाल्यानंतरही या अपघातातील आरोपी अजूनही पोलिसांच्या हाती लागलं नसल्याने रावेत परिसरातील नागरिक संताप व्यक्त करत आहेत. रावेत पोलिसांनी अपघाताला कारणीभूत ठरलेल्या वाहन चालकाला तात्काळ अटक केली नाही; तर आम्ही रस्त्यावर उतरून आंदोलन करणार असा इशारा रावेत परिसरातील नागरिकांनी दिला आहे.