Parbhani road Bus accident Death Toll : परभणी-पाथरी मार्गावर रात्री झालेल्या भीषण अपघातात मानवत येथील चार तरुणांचा जागीच मृत्यू झाला आहे. परभणीकडून पुण्याकडे जाणाऱ्या एका खासगी ट्रॅव्हल्सने दुचाकीला समोरासमोर जोरदार धडक दिल्याने हा अपघात घडला. 'NL 01 B 1374' क्रमांकाची खासगी ट्रॅव्हल्स परभणीहून पुण्याकडे जात होती. दरम्यान, राहुल जिनिंगसमोर समोरून येणाऱ्या 'MH 22 BB 4724' क्रमांकाच्या दुचाकीला या ट्रॅव्हल्सची समोरासमोर जोरदार धडक बसली. ही धडक इतकी भीषण होती की, दुचाकीवरील चारही जणांचा जागीच मृत्यू झाला.

मृतांमध्ये शुभम आप्पाराव दहे (३०), विष्णू गोरे (२८), प्रल्हाद अशोकराव कुटे (२९) आणि नवनाथ शामराव जाधव (३८) या मानवत येथील रहिवाशांचा समावेश आहे. मानवत शहराजवळील राहुल जिनिंगसमोर रात्री साडेनऊच्या सुमारास ही दुर्घटना घडली. या घटनेमुळे संपूर्ण मानवत शहरावर शोककळा पसरली आहे.

अपघाताची माहिती मिळताच सहाय्यक पोलीस निरीक्षकांसह पोलिसांचे पथक घटनास्थळी दाखल झाले. स्थानिक नागरिकांच्या मदतीने मृतांना तातडीने मानवत येथील ग्रामीण रुग्णालयात हलविण्यात आले. अपघातामुळे या मार्गावरील वाहतूक काही काळ विस्कळीत झाली होती, मात्र पोलिसांनी तातडीने कार्यवाही करत वाहतूक सुरळीत केली.

सर्व मृतदेह उत्तरीय तपासणीसाठी ग्रामीण रुग्णालयात ठेवण्यात आले असून, एकाच शहरातील चार तरुणांचा दुर्दैवी मृत्यू झाल्याने मानवतसह संपूर्ण परिसरात हळहळ व्यक्त होत आहे. पोलीस या प्रकरणाचा पुढील तपास करत आहेत.