परभणी : परभणी जिल्ह्यातील सोनपेठ शहरातील दहिखेड येथे मध्यरात्रीच्या सुमारास अचानक शॉर्टसर्किटमुळे घराला आग लागल्याची घटना घडली. यावेळी घरात झोपलेल्या परिवार सुदैवाने बचावला आहे. मात्र या दुर्घटनेत एकजण गंभीर जखमी झाला आहे.

परभणी (Parbhani News) जिल्ह्यातील सोनपेठ शहरातील दहीखेड परिसरातील बालाजी कोंडीबा वाकडे यांच्या घराला आग लागली होती. मध्यरात्रीच्या सुमारास शॉर्टसर्किटमुळे आग लागली. काही क्षणातच आगीचा मोठा भडका उडाला होता. घराला आग लागल्याचे परिसरात समजताच नागरिकांनी (Fire) आग विझविण्यासाठी धाव घेतली. काही वेळानंतर आग विझविण्यात यश मिळाले होते. दरम्यान आगीत नुकसान झाले असल्याने कुटुंब उघड्यावर आले असून शासनाने तात्काळ आर्थिक मदत द्यावी अशी मागणी करण्यात आली आहे.

आग विझविताना एकजण गंभीर 

घराला लागलेली आग विझविण्यासाठी गेलेले वैजनाथ कोंडीबा आव्हाड हे गंभीररीत्या भाजले गेले आहेत. त्यांना लागलीच प्राथमिक उपचार करून पुढील उपचारासाठी लातुर येथे पाठविण्यात आले आहे. दरम्यान आगीत घरातील संपूर्ण संसारोपयोगी साहित्य जळून खाक झाले असून यात अंदाजे तीन लाख रुपयांचे नुकसान झाल्याचा अंदाज व्यक्त केला जात आहे.