Parbhani Dengue News

बदलतं हवामान आणि ऊन-पावसाच्या खेळामुळे राज्यातील अनेक जिल्ह्यात सध्या डेंग्यूची साथ पसरली आहे. त्यामुळे आरोग्य प्रशासन सतर्क झालं असून नागरिकांना काळजी घेण्याचा सल्ला दिला जात आहे. अशातच परभणी जिल्ह्यातून एक धक्कादायक घटना समोर आली आहे. किनोळा गावात २० बालकांना डेंग्यूची लागण झाली असून अख्खं गाव तापाने फणफणलं आहे.  ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

दुर्दैवी बाब म्हणजे, डेंग्यूने एका ८ वर्षीय चिमुकल्याचा मृत्यू देखील झाला आहे. त्यामुळे नागरिकांमध्ये भीतीचं वातावरण पसरलं आहे. रूद्र सुदाम खरवडे असं मृत्युमुखी पडलेल्या चिमुकल्याचं नाव आहे. रुद्र दुसरीच्या वर्गात शिक्षण घेत होता.

अचानक ताप आल्याने त्याला परभणी (Parbhani News) येथील खाजगी रुग्णालयात उपचारासाठी दाखल करण्यात आले. परंतु त्याच्या प्रकृतीत सुधारणा होत नसल्याने डॉक्टरांनी त्यास नांदेड येथील रुग्णालयात पाठवले. परंतु तेथेही त्याच्या प्रकृतीत सुधारणा झाली नाही.

त्यामुळे डॉक्टरांनी शनिवारी (९ डिसेंबर) रुद्रला हैदराबाद येथील रुग्णालयात अॅडमिट करण्याचा सल्ला दिला. मात्र, हैदराबाद येथे जाण्यापूर्वीच त्याचा मृत्यू झाला. दरम्यान, रुद्रच्या अचानक मृत्युमुळे खरवडे कुटुंबियांवर दु:खाचा डोंगर कोसळला आहे.

रुद्रची मोठी बहीण दर्शना हिला देखील डेंग्यूची लागण झाली असून तिची प्रकृती स्थिर आहे. या पाठोपाठ किनोळा गावातली जवळपास १०० ते १५० लोकांना ताप आल्याने ते रुग्णालयात उपचार घेत आहेत. यातील जवळपास २० बालकांना डेंग्यू झाल्याचा अहवाल प्राप्त झाला आहे.

गाव डेंग्यूच्या आजाराशी सामना करत असताना आरोग्य यंत्रणा माञ याकडे दुर्लक्ष करत असल्याचा आरोप गावकऱ्यांनी केला आहे. नागरिकांनी या बद्दल संताप व्यक्त केला आहे. हिवतापाचा आजार नियंत्रणासाठी जनजागृतीसाठी पंधरवडा पाळला जातो. मात्र, आरोग्य विभाग कुठलीही दक्षता घेत नसल्याचं नागरिकांचं म्हणणं आहे.

Edited by - Satish Daud-Patil