पंढरपूर : विधानसभा निवडणुकीच्या पूर्वी मराठा आरक्षणावरून राज्यातील वातावरण तापले होते. अर्थात मराठा व ओबीसी हे महायुती विरोधात जातील असे सांगितले जात होते. निवडणुकी निमित्ताने मराठा विरुद्ध ओबीसी असा संघर्ष पेटलेला असतानाच ओबीसी नेते लक्ष्मण हाके यांनी महाराष्ट्रातील ओबीसी महायुतीला पाठिंबा देतील असा मोठा दावा केला आहे. 

मराठा आरक्षण (Maratha Aarkshan) आंदोलक मनोज जरांगे यांनी ओबीसी नेत्यांच्या विरोधात भूमिका घेतल्यानंतर आता ओबीसी नेते लक्ष्मण हाके यांनीही महाविकास आघाडीच्या मराठा नेत्यांच्या विरोधात भूमिका घेतली आहे. दगडापेक्षा वीट बरी असे म्हणत त्यांनी महायुतीला (Mahayuti) आपला पाठिंबा असेल असे जाहीर केले आहे.  

शरद पवार यांचे उमेदवार ज्या मतदारसंघात आहेत. तिथे धनगर, ओबीसी मतदार हा बेस आहे. आम्ही ठरवले तर राजेश टोपे, कवठे महांकाळमध्ये रोहित पाटील आणि मोहिते पाटील हे निवडून येऊ शकणार नाहीत; असा इशारा लक्ष्मण हाके यांनी दिला आहे. 

शरद पवार कोणत्यातरी बुजगावण्याला होळकरांचे वंशज म्हणून घेऊन फिरत आहेत. ते वंशज नाहीत, होळकरांचे वंशज रॉयल आहेत. ते महाराष्ट्र बाहेर आणि परदेशात वास्तव्यास असतात. असे म्हणत अप्रत्यक्षपणे नाव न घेता राजेभूषण सिंह होळकर हे वंशज नाहीत, असा दावाही त्यांनी केला आहे.