पंढरपूर : पंढरपूरच्या विठुरायाच्या भाविक भक्त मोठा आहे. लाखोंच्या संख्येने भाविक पंढपुरात दाखल होत असून आलेले भाविक विठुरायाच्या चरणी सोने- चांदीचे दागिने अर्पण करत असतात. तर एका मुस्लिम तरुणाची विठू माऊलीवर असलेली अनोखी श्रद्धा आणि भक्ती पाहण्यास मिळाली आहे. या तरुणाने विठ्ठलावर असलेल्या श्रद्धेतून आषाढी यात्रेच्या पार्श्वभूमीवर चांदीचा मुकुट विठुरायाला अर्पण केला आहे.  

लातूर येथील एका मुस्लिम तरुणाच्या अनोख्या विठ्ठल भक्तीचे दर्शन यातून झाले आहे. दगड फोडून कुटुंबाचा उदरनिर्वाह करणाऱ्या गणी सय्यद या मुस्लिम तरुणाने विठुरायाच्या चरणावर एक लाख रुपये किंमतीचा एक किलो वजनाचा चांदीचा मुकूट अर्पण केला आहे. देव, देश आणि धर्म एक असल्याचा संदेशही सय्यद यांनी आपल्या कृतीतून दिला. मशिदीमध्ये जावून नमाज पठण करणारा गणी सय्यद शुक्रवारी थेट गाभाऱ्यात जाऊन विठुरायाच्या चरणावर लीन झाला. त्याच्या या अनोख्या विठ्ठल भक्तीचे सर्वत्र कौैतुक  होत आहे. त्याच्या भक्तीने भारावलेल्या विठ्ठल मंदिर समितीचे सह अध्यक्ष गहिनीनाथ महाराज यांनी त्याचा सत्कार केला.

मंदिरासाठी दगड फोडून देण्याचे करतोय काम 
लातूर येथील मुस्लिम समाजातील गणी सय्यद हा देखील एक विठ्ठल भक्त आहे. विठ्ठल मंदिर जतन आणि संवर्धनाचे काम सुरु आहे. यामध्ये त्याला मंदिरासाठी लागणारा दगड फोडून देण्याचे काम मिळाले आहे. त्यामुळे त्यांचे मंदिरात येणे जाणे वाढले आणि तिथेच तो विठ्ठलाचा भक्त झाला. त्यातूनच तो आज धर्म आणि जातीच्या भिंती तोडून विठ्ठलाच्या पायावर एक देवाचा लाडका भक्त म्हणून लीन झाला.

सय्यद यांचे कुटुंबीय जातात कीर्तन ऐकण्यास 
दरम्यान आपण देवाचे काही तरी देणे लागतो; या भावनेतून त्यांनी एक लाख रुपये किंमतीचा एक किलो वजनाचा चांदीचा मुकुट अर्पण केला आहे. मी मुस्लिम असलो तरी, मी आणि माझे कुटुंबिय भजन, कीर्तन ऐकण्यासाठी जातो. देव एकच आहे. अंत:करणात शुद्ध भाव असला पाहिजे; अशी भावना गणी सय्यद यांनी व्यक्त केली.