पंढरपूर : लाखो भाविकांचे श्रद्धास्थान असलेल्या पंढरपूरच्या विठुरायाच्या लाडू प्रसादाला भाविकांकडून (Pandharpur) मागणी वाढली आहे. मंदिर समितीने ठेकेदारी पध्दत रद्द करून स्वतः लाडू तयार करून विक्री सुरू केली आहे. या लाडू विक्रीतून मंदिर समितीला एकाच महिन्यात सुमारे दहा लाखांचा नफा मिळाला आहे. (Live Marathi News)

पंढरपूरात विठ्ठल रुक्मिणी दर्शनाला येणारे भाविक हमखास विठुरायाचा प्रसाद म्हणून लाडू खरेदी करतात. भाविकांना स्वच्छ व चांगल्या दर्जाचा लाडू प्रसाद उपलब्ध करून देण्याचा निर्णय घेण्यात आला आहे. यापूर्वी ठेकेदाराकडून लाडू तयार करून मंदिर समिती त्याची विक्री करत होते. अलीकडेच मंदिर समितीने (vitthal Rukmini Temple) लाडू तयार करण्याचा ठेका रद्द करून समितीने स्वतः लाडू तयार करण्याचे काम हाती घेतले आहे. मंदिर समितीकडून तयार केल्या जाणाऱ्या लाडू प्रसादाला आता भाविकांकडूनही चांगला प्रतिसाद मिळू लागला आहे.

अडीच लाख लाडू विक्री

दररोज साधारण पाच हजाराहून अधिक लाडूंची २० रूपये इतक्या अल्प दरात विक्री केली जाते. मंदिर समितीने लाडू तयार करण्याचे काम हाती घेतल्यापासून लाडू प्रसादापासून मिळणाऱ्या उत्पन्नाची वाढ झाली आहे. १४ एप्रिल ते २० मे दरम्यानच्या काळामध्ये मंदिर समितीने जवळपास दोन लाख ५२ हजार ९०० लाडू तयार केले. लाडू विक्रीतून सुमारे २५ लाख २९ हजार रुपयांचे उत्पन्न मिळाले. त्यातून १५ लाख ७० हजार रुपये इतका खर्च आला आहे. खर्च वजा जाता मंदिर समितीला केवळ एका महिन्यामध्येच लाडू विक्रीतून सुमारे दहा लाख रुपयांचा निव्वळ नफा मिळाला आहे.