पंढरपूर : अवैध वाळू उपसा आणि वाहतूकी विरोधात पंढरपूरच्या महसूल विभागाने धडक मोहिम हाती घेतली आहे. आज तहसीलदार सुशील बेल्हेकर यांच्या मार्गदर्शनाखाली महसूल विभागाच्या कर्मचाऱ्यांनी पंढरपूर, भटुंबरे व इसबावी येथे अवैध वाळू उपशा विरोधात कारवाई केली. कारवाई दरम्यान चंद्रभागा नदीतून वाळू उपसा करणाऱ्या ११ बोटी व लाकडी होड्या पेट्रोल टाकून जाळून नष्ट केल्या.

हे देखील पहा :

भटुंबरे, इसबावी व पंढरपुरातील (Pandharpur) चंद्रभागा नदीपात्रातून लाकडी होड्या व बोटीद्वारे अवैध वाळू उपसा करुन त्याची परस्पर विक्री सुरु असल्याची माहिती महसूल (Revenue Department) विभागाला मिळाली होती. त्यानुसार महसूल विभागाच्या अधिकाऱ्यांनी आज सकाळी चंद्रभागा नदी पात्रात जाऊन अवैध वाळू उपशाविरोधात कारवाई केली.

कारवाई दरम्यान वाळू उपसा करण्यासाठी वापरल्या जाणाऱ्या ११ बोटी (Boat) नदीपात्रात आढळून आल्या. या सर्व बोटी व होड्याची तोडफोड करुन त्या जाळून नष्ट केल्या. बोटी नष्ट केल्या असल्या तरी बोटीच्या मालकांवर मात्र अद्याप कोणतीच कारवाई करण्यात आली नाही. वाळू माफियांवर (Sand Mafia) कारवाई करावी अशी मागणी पर्यावरण प्रेमी नागरिकांमधून केली जात आहे.

Edited By : Krushnarav Sathe