- सागर निकवाडे

Nandurbar News : घरातील कर्त्या माणसाचा आधार गेल्यानंतर दुःख करत न बसता परिस्थितीशी दोन हात करत नंदुरबार सारख्या आदिवासी दुर्गम जिल्ह्यातील शहादा येथील पल्लवी बेलदार या तरुणीने नंदुरबार जिल्ह्यात पहिली महिला बस चालक (Pallavi Beldar MSRTC Bus Driver) होण्याचा मान मिळवला आहे. पल्लवीच्या हा प्रवास संघर्षमय राहिला असून तिने जिल्ह्यातील शहादा आगारातील बस फेऱ्या मारून आपल्या कामाचा नुकताच श्रीगणेशा केला. (Maharashtra News)

पल्लवीची वडिलांचा काेराेनाच्या काळात मृत्यू झाला. त्यामुळे बेलदार कुटुबियांचा आधार गेला. त्यापुर्वी सन 2017 मध्ये तिच्या भावाचा मृत्यू झाला. मोठ्या बहिणीचे लग्न झाल्याने घराची जबाबदारी पल्लवीवर आली. सन 2019 मध्ये ती चालकाचे प्रशिक्षण घेत असताना वडील कोरोनात गेले.

आता काय करावे हा मोठा प्रश्न तिच्या समोर होता. आईचा सांभाळ घराची जबाबदारी आणि एसटी महामंडळ मधील चालकाची ट्रेनिंग या सर्व गोष्टींचा मिलाफ करत परिस्थितीशी दोन हात करण्याचा निर्धार तिने केला.

संघर्षमय परिस्थितीत न डगमगता तिने छत्रपती संभाजी नगर येथे आपले प्रशिक्षण पूर्ण केले. त्यानंतर शहादा आगारात बस चालक म्हणून ती जिल्ह्यातील पहिली महिला एसटी चालक म्हणून रुजू झाली.

आज कालच्या तरुणी कोणत्याही क्षेत्रात मागे नाहीत. त्यांनी मनात कोणताही प्रकारचा दडपण न ठेवता संघर्ष केल्यास यश नक्की प्राप्त होते हे पल्लवीने तिच्या कर्तुत्वाने सिद्ध केले. मनाशी जिद्द बाळगत तिने हे स्वप्न पुर्ण केल्याने तिच्या आई देखील खूप खूष झाली आहे.

आपली मुलगी जिल्ह्यातील पहिली बस चालक झाल्याचा सार्थ अभिमान तिच्या आईच्या चेहऱ्यावर दिसून आला. अभिमानासोबतच तिच्या आईच्या चेहऱ्यावरील आनंदाश्रू पल्लवीच्या यशाची ग्वाही देतात वडील गेल्यानंतर अत्यंत हलाखीच्या परिस्थितीत बहीण आणि पाहुण्यांनी केलेल्या मदतीवर परिवाराचा सांभाळ करत मिळवलेले यश माझ्यासाठी जगातील सर्वात मोठा आनंद असल्याची प्रतिक्रिया पल्लवीच्याने आईने साम टीव्हीशी बाेलताना दिली.

केल्याने होते रे केलेच पाहिजे या उक्ती प्रमाणे आलेल्या संकटात न डगमगता पल्लवीने संघर्ष करत आपलं प्रशिक्षण पूर्ण करून जिल्ह्यातील पहिली महिला बस चालक होण्याचा सन्मान मिळवला. ही तिच्यासाठी जशी अभिमानाची गोष्ट आहे तशीच आजच्या नवीन पिढीसाठी आणि तरुणींसाठी प्रेरणादायी कहाणी ठरेल हे मात्र निश्चित.

Edited By : Siddharth Latkar