फैय्याज शेख 
वाडा (पालघर) : प्रसूती कडा जाणवत असल्याने कुटुंबीय गरोदर महिलेला प्रसूतीसाठी वाडा येथील ग्रामीण रुग्णालयात घेऊन गेले. मात्र येथील डॉक्टर व नर्सने सदर महिलेला ठाणे जिल्हा रुग्णालयात घेऊन जाण्यास सांगितले. यानंतर महिलेला नेत असताना वाडा- भिवंडी महामार्गावर रात्री महिलेची प्रस्तूती झाल्याची घटना घडली आहे. डॉक्टरांच्या बेजबाबदारपणामुळे हा प्रकार घडल्याचे सांगण्यात येत आहे.

पालघर जिल्ह्यातील वाडा तालुक्यातील आब्जा गावातील गरोदर महिलेचे पोट दुखू लागल्याने तिच्या पतीने तिला रात्री वाडा ग्रामीण रूग्णालयात घेऊन आले. मात्र वाडा ग्रामीण रुग्णालयातील डॉक्टर व नर्स यांनी या महीलेला रूग्णालयात दाखल करण्यासाठी मनाई केली. इतकेच नाही तर ठाणे येथील सिव्हील रूग्णालयात घेऊन जाण्यास सांगितले. महिलेला त्रास अधिक होत असल्याने पतीने लागलीच ठाणे नेण्याचा निर्णय घेतला. 

मध्यरात्री रस्त्यावर प्रसूती 

सदर गरोदर महिलेचा पती कैलास भोयू याने १०८ रूग्णवाहीका बोलावून ठाणे येथे घेऊन जाण्यासाठी मार्गस्थ झाला. मात्र रात्री दोन ते अडीच वाजेच्या सुमारास या महीलेची प्रस्तूती रस्त्यातच झाली. सदर महीलेला दोन तास या रस्त्यावरच खूप यातना सहन कराव्या लागल्या. प्रसूती झाल्यामुळे तिला ठाणे न नेता पुन्हा वाडा रूग्णालयात पुढील उपचारासाठी आणले.  

पुढील उपचारासाठी घेण्यासही नकार 

प्रसूती झाल्यानंतर सदर महिलेला वाडा ग्रामीण रुग्णालयात पुढील उपचारासाठी आणले असता येथे दाखल करून घेण्यास डॉक्टर व नर्स यांनी नकार दिला. हात जोडून विनंती केल्यावर यांनी महीलेला रूग्णालयात दाखल करून घेतल्याचा सर्व प्रकार केवळ वाडा रूग्णालयातील डॉक्टर व नर्समुळे झाला आहे. यामुळे या रूग्णालयातील डॉक्टर व नर्स यांची चौकशी होणे गरजेचे आहे; असे सांगितले जात आहे.