लहान असो या वयोवृद्ध... आता कोणत्याही वयोगटातील व्यक्तींना हृदयविकाराचे झटके येत आहेत. हृदयविकाराच्या झटक्याने अनेक हसत्या-खेळत्या व्यक्तीचा मृत्यू होऊ लागला आहे. शाळकरी मुलांमध्येही हृदयविकाराचा झटका येण्याचे प्रमाण वाढू लागले आहे. पालघरमध्येही हृदयविकाराच्या झटक्याने एका शाळकरी विद्यार्थिनीचा मृत्यू झाल्याची घटना घडली. विद्यार्थिनीच्या मृत्यूने पालघरमध्ये शोककळा पसरली आहे.

पालघरच्या शाळेच्या क्रीडा स्पर्धेतील मॅरेथॉनमध्ये तृतीय क्रमांक पटकावलेल्या विद्यार्थिनीचा हृदयविकाराच्या तीव्र झटक्याने मृत्यू झाल्याची घटना घडली. तलासरीच्या वेवजी येथील लोकभारती संस्थेच्या भारती अकादमी इंग्लिश स्कूलमधील धक्कादायक प्रकार घडला. रोशनी रमेश गोस्वामी असं मृत विद्यार्थिनीचं नाव आहे.

हृदयविकाराच्या तीव्र झटक्याने मृत्यू झालेली विद्यार्थिनी इयत्ता दहावीत होती. मॅरेथॉन स्पर्धा पार पडल्यानंतर अवघ्या काही वेळातच हृदयविकाराचा झटका आला. या मॅरेथॉनमध्ये धावल्यामुळे झटका आल्याची प्राथमिक माहिती हाती आली आहे. हृदयविकाराचा झटका आलेल्या रोशनीला गुजरातच्या उंबरगाव येथील रुग्णालयात उपचारासाठी दाखल केलं. मात्र, वैद्यकीय अधिकाऱ्यांनी रोशनीला मृत घोषित केलं.

उमेदवाराचा हार्ट अटॅकने मृत्यू

मिरा-भाईंदरमध्ये निवडणुकीदरम्यान अजित पवार गटाच्या उमेदवाराचा हार्ट अटॅकने मृत्यू झाल्याची घटना दोन दिवसांपूर्वी घडली. उमेदवारीसाठी अर्ज केल्यानंतर काही वेळानंतर त्याचा हृदयविकाराच्या झटक्याने मृत्यू झाला. जावेद पठाण असे ६६ वर्षीय उमेदवाराचे नाव होते. त्यांच्या मृत्यूने मिरा-भाईंदरमधील मृत्यूने राजकीय वर्तुळात शोककळा पसरली आहे.