पालघर : महिलांची फसवणूक करण्याचे अनेक प्रकार आजपर्यंत समोर आले आहेत. या दरम्यान सर्फ व्यावसायिकाने दागिने बनवून देण्याच्या नावाने ७९ महिलांना तब्बल एक कोटी २६ लाखांचा गंडा घालून पसार झाला. या प्रकरणी सराफ व्यावसायिकाला राजस्थानमधून ताब्यात घेण्यात आले आहे. 

पालघरच्या (Palghar) सफाळे येथे गणेश ज्वेलर्स नावाने सराफ दुकान सुरू केले. यानंतर नव्याने दागिने बनवून देतो असं सांगत या संशयित आरोपीने सफाळेसह परिसरातील ७९ महिलांचे तब्बल एक कोटी २६ लाख रुपये किमतीचे दागिने घेतले. हे सर्व दागिने घेऊन हा सराफ व्यावसायिक पसार झाला होता. घडल्या प्रकाराबाबत सदर महिलांनी पालघर पोलिसात तक्रार दाखल केली होती. या तक्रारीवरून (Crime News) पोलिसांकडून तपास सुरु करण्यात आला होता. 

याच दरम्यान एका संशयित आरोपीला पालघर पोलिसांनी अटक केली होती. मात्र सदर प्रकरणातील मुख्य आरोपी मागील अनेक महिन्यांपासून फरार होता. या आरोपीला देखील मोठ्या शिताफीने पालघर पोलिसांनी राजस्थान येथून अटक केली आहे. तसेच त्याच्याकडून १७ लाखांचा मुद्देमाल जप्त करण्यात आला आहे. या प्रकरणी पुढील तपास सुरु आहे.