Beed Farmer Problems: बीडच्या पाटोदा तालुक्यात शंकी गोगलगायमुळे सोयाबीन उत्पादक शेतकरी अडचणीत सापडला आहे. उगवून आलेल्या कोवळ्या सोयाबीन पिकाला गोगलगाय खावून टाकत असल्याने शेतकरी हवालदील झाला आहे. तर काही शेतकऱ्यांना दुबार पेरणी करावी लागणार आहे. अगोदरच जुलै महिना अर्ध्यावर आला असताना अद्यापही म्हणावा तसा पाऊस पडला नाही. त्यातच गोगलगायींचा प्रादुर्भाव वाढल्याने शेतकरी संकटात सापडले आहेत. (Latest Marathi News)

पाटोद्यात मागील 3 ते 4 वर्षांपूर्वी शंखी गोगलगायींचे प्रमाण अल्प होते. मात्र, यावर्षी हे प्रमाण वाढू लागल्याने शेतकऱ्यांमध्ये चिंता वाढली आहे. शंखी गोगलगाय सोयाबीनचे कोवळे कोंब खात असल्याने रोपे वाया जात आहेत. पिकांचे नुकसान टाळण्यासाठी गोगलगायींचा बंदोबस्त करणे गरजेचे आहे.

दुबार पेरणीच्या भीतीने 30 वर्षीय शेतकऱ्याने संपवलं जीवन

पीककर्ज काढून पेरणी केली. मात्र, पाऊस (Rain) पडत नसल्यामुळे दुबार पेरणी करावी कशी? या विवचनेतून बीडच्या कुंबेफळ येथे एका 30 वर्षीय शेतकऱ्याने घराच्या दारासमोर असलेल्या झाडाला गळफास घेऊन आत्महत्या केलीय. महेश भागवत थोरात रा. कुंबेफळ ता. केज असं आत्महत्या केलेल्या तरुण शेतकऱ्याचे नाव आहे.

मयत महेश यांच्या आई-वडिलांच्या नावे जवळपास 4 एकर जमीन आहे. पाऊस कमी झाल्याने दुबार पेरणी करावी लागते की काय? असा प्रश्न त्यांच्यापुढे होता. त्यामुळं याच विवंचनेत त्याने आत्महत्या केल्याचे त्याच्या नातेवाइकांनी सांगितले आहे. दरम्यान याप्रकरणी बीडच्या (Beed) केज पोलीस (Police) ठाण्यात मृत्यूची आकस्मिक नोंद करण्यात आली आहे.