दरवर्षीप्रमाणे यंदा पुन्हा कांद्यानं शेतकऱ्यांचा वांधा केलाय. मागील वर्षी अतिवृष्टीमुळे कांद्याचे झालेले नुकसान, दुबार पेरणी आणि खतांचा खर्च यामुळे आधीच मेटाकुटीला आलेल्या शेतकऱ्याला आता बाजारभावाचाही फटका बसलाय. कांद्याला ७०० ते १०५० रुपये भाव मिळाल्याने शेतकरी संतप्त झालेत. इतक्या पैशांमध्ये उत्पादन खर्च देखील वसूल होणे कठीण असल्याने शेतकऱ्यांच्या संतापाचा बांध फुटला. संतप्त शेतकऱ्यांनी नांदगाव-येवला मार्ग रोखून धरला. कांद्याला हमीभाव मिळावा, अशी मागणी कांदा उत्पादकांनी केलीय.

दुसरीकडे चांदवडमध्ये शेतकरी आमरण उपोषणाला बसलेत. विधीमंडळाचं अधिवेशन सुरु असताना कांदा उत्पादकांनी आपल्या मागण्यांकडे सरकारचं लक्ष वेधलंय. गेल्या 2 महिन्यांपासून कांद्याच्या दरात सातत्याने घसरण होत आहे. एक हजार रुपयांपर्यंत भाव गडगडलेत. चांदवड तालुक्यामध्ये कांद्याचे उत्पादन मोठ्या प्रमाणात होते. त्यामुळे चांदवड बाजार समितीत कांदा आणि मका उत्पादक शेतकऱ्यांनी आमरण उपोषणाला सुरवात केलीये.

कांद्याला 3000 हजार रुपये हमीभाव, आजपर्यंत विक्री झालेल्या कांद्यास प्रतिक्विंटल 1500 रुपये प्रमाणे अनुदान मिळावे. तसेच मका हमीभाव खरेदी केंद्र वाढवून हमीभाव खरेदीला गती द्यावी, अशी मागणी आहे. त्याशिवाय 2 महिन्यांपूर्वी खरेदी केलेल्या मक्याचे पेमेंट तात्काळ जमा करावे, अशा विविध मागण्यांसाठी शेतकरी आमरण उपोषणाला बसलेत. अतिवृष्टी तसेच अवकाळी पाऊस, खते आणि औषधांचा वाढता खर्च, बाजारभावातील चढ-उतार यामुळे कांद्याची शेती आतबट्ट्याची झालीय. दरवर्षीचं नुकसान आणि वाढतं कर्ज यामुळे शेतकरी आर्थिक संकटात सापडलाय. केंद्राच्या धरसोड निर्यात धोरणाचाही फटका बसतोय. त्यामुळे कांद्याच्या प्रश्नावर कायमस्वरूपी तोडगा कधी काढणार ? हाच खरा प्रश्न आहे.