Aurangabad News : शिवसेनेचे आमदार आणि युवासेना नेते आदित्य ठाकरे यांच्या गाडीवर मंगळवारी दगडफेक झाल्याची घटना समोर आली होती. यानंतर विरोधी पक्षनेते अंबादास दानवे यांनी पोलीस महासंचालकांना पत्र देखील लिहिले होते. परंतु आता औरंगाबाद ग्रामीण पोलिसांनी आदित्य ठाकरेंच्या गाडीवर एकही दगड फेकला गेला नाही असा मोठा दावा केला आहे.

थोडा गोंधळ झाला पण दगडफेक नाही - पोलीस

शिवसेना नेते आमदार आदित्य ठाकरे आणि विधान परिषदेचे विरोधी पक्षनेते अंबादास दानवे यांच्या गाडीवर झालेल्या दगडफेकीवर औरंगाबाद पोलिसांचा मोठा खुलासा केला आहे.

आदित्य अथवा विधान अंबादास दानवे यांच्या गाडीवर एकही दगड फेकला गेला नाही, थोडा गोंधळ झाला पण दगडफेक झाली नाही, अशी माहिती औरंगाबाद ग्रामीणचे ॲडिशनल एसपी सुनिल लांजेवार यांनी दिली आहे. (Latest Marathi News)

शिवसेनेचे आमदार आणि युवासेना नेते आदित्य ठाकरे राज्यभरात शिवसंवाद यात्रा साधत आहेत. आदित्य ठाकरेंची संवाद यात्रा औरंगाबादेतील महालगावात असताना सभेच्या ठिकाणी गोंधळ झाल्याची घटना समोर आली होती. आदित्य ठाकरे यांचा संवाद यात्रेचा कार्यक्रम आणि या परिसरात निघालेली रमाईंची मिरवणूक एकावेळी सुरु झाली.

अशावेळी रमाईंची मिरवणूक थांबवल्याने जमावाने या ठिकाणी किरकोळ दगडफेक केल्याचा दावा शिवसेनेकडून करण्यात आला होता. विरोधी पक्षनेते आंबादास दानवे यांनी आदित्य ठाकरेंच्या सुरक्षेत हलगर्जीपणा झाल्याचा आरोप देखील केला होता.