जालना - महाराष्ट्राच्या हद्दीपर्यंत कोरोनाच्या AY-4  व्हेरियंटचा शिरकाव झाला नसून हा शिरकाव महाराष्ट्रात होऊ नये म्हणून आरोग्य विभागाला योग्य सूचना केल्या जातील अशी माहिती राज्याचे आरोग्यमंत्री राजेश टोपे यांनी दिली आहे. ते जालन्यात बोलत होते. केंद्राच्या टास्क फोर्सने जलदगतीने लसीकरण करण्याच्या सूचना राज्यांना केल्याची माहिती समोर आली आहे.

हे देखील पहा -

मिशन कवचकुंडल अंतर्गत महाराष्ट्रात दिवाळीपर्यंत वेगाने लसीकरण केलं जाणार असल्याचे देखील ते म्हणाले. लसीकरण वेगाने होण्यासाठी आणखी काही विभागाची मदत घेतली जाणार असल्याची माहिती देखील टोपे यांनी दिली.सध्या दोन डोस मधील अंतर 84 दिवसांचे आहे. या दोन डोस मधील अंतर कमी करण्याचा केंद्राचा मानस नाही त्यामुळे हे अंतर तसेच कायम राहील असंही ते म्हणाले. दिवाळी आधी शेतकऱ्यांना मदत करण्यासाठी 2-3 दिवसांत अर्थ विभागाकडे पाठपुरावा करून प्रयत्न केले जाणार असल्याचे देखील टोपे यांनी सांगितले.

दरम्यान,इंदौरमध्ये जीनोम सिक्वेन्सिंग तपास अहवालात कोरोनाचे AY-4 चे नवीन व्हेरिएंट आढळून आले आहे. हा डेल्टाचाच एक नवीन व्हेरिएंट असल्याचे बोलले जात आहे.इंदौरसह मध्य प्रदेशातून नवी दिल्लीत पाठवण्यात आलेल्या नमुन्याच्या चाचणी अहवालात नव्या व्हेरिएंटची आतापर्यंत 7 प्रकरणे आढळून आली आहे. 

इंदौरमध्ये सध्या दररोज १ ते २ कोरोनाचे रुग्ण आढळून येत आहेत. त्यांचे नमुने तपासणीसाठी दिल्लीला पाठवण्यात आले होते. 16 ऑक्टोबरच्या अहवालात ७ नमुन्यांमध्ये हा नवा व्हेरिएंट आढळून आला आहे. त्यापैकी तीन महू, दोन जण न्यू पलासिया आणि एक दुबेची बाग येथील असल्याची माहिती समोर आली आहे. दरम्यान,१ ऑक्टोबर पर्यंतच्या अहवालात, १३ नमुन्यांपैकी एका नमुन्यात AY-4 आणि चार नमुन्यांमध्ये AY-12 व्हेरिएंट आढळून आला आहे.

Edited By - Shivani Tichkule